R.Sultanov A.Zeynallı adına Musiqi Texnikumunu bitirmişdir. 1985-ci ildə ifaçıların respublika müsabiqəsinin qalibi olmuşdur. Həmin ildən bəstəkar Polad Bülbüloğlunun yaratdığı «Aşıqlar» ansamblında saksofon ifaçısı kimi çalışmışdır. Bu kollektivlə birgə bir çox xarici ölkələrdə çıxış etmişdir.
1988-ci ildə SSRİ Xalq Artisti Rəşid Behbudovun dəvəti ilə Dövlət Mahnı Teatrında, daha sonra 1990-cı ildən «Qaya» Dövlət ansamblında, 1992-ci ildən Azərbaycan Dövlət Teleradio Şirkəti estrada-simfonik orkestrində solist-musiqiçi kimi çalışmışdır
1996-1997-ci illərdə R.Sultanov Almaniyada keçirilmiş caz festivallarında iştirak etmiş, tamaşaçıların böyük rəğbətini qazanmışdır. R.Sultanov «Sindikat» qrupu yaradıcıdır, bir neçə kompakt-disklər buraxmışdır.
2002-ci ildə Bakıda keçirilən «Caspian Jazz Blues Festival» təşkilatçılarından biri olmuş, «Azərbaycan cazının antologiyası» kitabının (2003-cı) müəllifidir.
2004-cı ildən R.Sultanov «Bakı Caz mərkəzi»nin baş direktoru vəzifəsində çalışır. 2005-2006-cı illərdə Bakıda keçirilən Beynəlxalq caz festivallarının bədii rəhbəri və prodüserdir.