Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
20.09.2017 17:37
Bakıda Novosibirsk Filarmonik Kamera Orkestrinin konserti olubSentyabrın 19-da M.Maqomayev adına Azərbaycan Dövlət Filarmoniyasının səhnəsində Xalq Artisti, beynəlxalq müsabiqələr laureatı, Prezident mükafatçısı Əyyub Quliyevin idarəçiliyi ilə Novosibirsk Filarmonik Kamera Orkestrinin (Rusiya) konserti olub. Konsert “Gilan Hospitality” şirkətinin, Azərbaycan Mədəniyyət və Turizm Nazirliyinin, Rusiyanın Novosibirsk vilayətinin Mədəniyyət Nazirliyinin dəstəyi ilə Üzeyir Hacıbəyli IX Beynəlxalq Musiqi Festivalı çərçivəsində təşkil edilib. Proqramda Azərbaycanda ilk dəfə səslənən əsərlər – Rodion Şedrinin “Concerto Iolanta” altıncı fortepiano konserti, Giya Kançelinin “Daneliada”, Arvo Pyartın “Fratres”, habelə Firəngiz Əlizadənin “Metamorfozalar” əsərləri yer alıb. V.A.Mosartın, P.Çaykovskinin və Q.Qarayevin orkestr üçün əsərləri də ifa olunub. Solist kimi Rusiyanın Əməkdar Artisti, Novosibirsk Filarmonik Kamera Orkestrinin konsertmeysteri Yuliya Rubina və beynəlxalq müsabiqələr laureatı, istedadlı pianoçu Riad Məmmədov çıxış ediblər. R.Məmmədov Rodion Şedrinin konsertini Bakıda ilk dəfə ifa edib. Novosibirsk vilayətinin mədəniyyət nazirinin müavini Yevgeni Sazonov müsahibəsində deyib: “Biz Azərbaycandan olan həmkarlarla bütün müstəvilərdə əməkdaşlığı inkişaf etdirmək istəyirik. Novosibirsk vilayətində kifayət qədər festival və müsabiqə keçirilir və biz bu mədəniyyət tədbirlərində Azərbaycandan nümayəndələri görmək istərdik. Novosibirskdə Azərbaycan mədəniyyətini və dilini təbliğ edən ictimai təşkilat - Rusiya-Azərbaycan Evi fəaliyyət göstərir. Bizim flaqmanımız isə musiqi sahəsində əməkdaşlıqdır. Bayançalan duetimiz bu yaxınlarda Bakıda olub. Bu gün kamera orkestrimiz çıxış etdi. Bizim daha geniş formatda əməkdaşlıq etmək planlarımız var”. Y.Sazonov qeyd edib ki, Qəbələ Beynəlxalq Musiqi Festivalı Novosibirskdə geniş tanınır və novosibirskli musiqiçilər bu festivalda iştirak etmək dəvətini məmnuniyyətlə qəbul edirlər. Qeyd edək ki, Novosibirsk orkestri sentyabrın 20-də Əyyub Quliyevin idarəçiliyi ilə Sumqayıtda da çıxış edəcək. Xatırladaq ki, sentyabrın 18-dən 26-dək Bakıda Azərbaycan Mədəniyyət və Turizm Nazirliyinin və Heydər Əliyev Fondunun dəstəyi ilə Üzeyir Hacıbəyli IX Beynəlxalq Musiqi Festivalı keçirilir.   ..
20.09.2017 17:24
“D`ACCORDO” ansamblının ifasında barokko və renessans musiqisi səsləndirilibSentyabrın 19-da M.Maqomayev adına Azərbaycan Dövlət Filarmoniyasının kamera və orqan musiqisi zalında Üzeyir Hacıbəyli IX Beynəlxalq Musiqi Festivalı çərçivəsində “D`ACCORDO” ansamblı “Barokko və renessans” adlı konsert proqramını təqdim edib. Ansamblın bədii rəhbəri İlahə Sadıqzadədir. Solo hissədə Fəridə Məmmədova (soprano) və Səbinə Əsədova (mezzo-soprano) çıxış ediblər. Konsertdə Tilman Suzato, Mixael Pretorius, Antonio Vivaldi, Georq Hendel, Luici Bokkerini və digər bəstəkarların əsərləri səsləndirilib. ..
20.09.2017 17:07
Opera və Balet Teatrı mövsümü açıq elan edibSentyabrın 19-da Azərbaycan Dövlət Akademik Opera və Balet Teatrı 109-cu teatr mövsümünü Ü.Hacıbəylinin “Leyli və Məcnun” operası ilə açıq elan edib. Səhnə əsərində Məcnun obrazını Xalq Artisti Mənsum İbrahimov canlandırıb. Gənc solist Arzu Əliyeva Leyli rolunu ifa edib. Quruluşçu rejissoru Əməkdar İncəsənət Xadimi Hafiz Quliyev olan operada Əməkdar artistlər Cahangir Qurbanov (Nofəl), Təyyar Bayramov (İbn-Salam) və Sabir Əliyev (Şeyx) də iştirak ediblər. Səhnə əsəri dirijor, Əməkdar İncəsənət Xadimi Sevil Hacıyeva tərəfindən idarə olunub. Ü.Hacıbəyli IX Beynəlxalq Musiqi Festivalı çərçivəsində reallaşan tamaşanın zəngin səhnə dekorasiyası və ifaçıların məharətli çıxışı səhnə əsərini daha baxımlı edib, operanın növbəti təqdimatı maraqla qarşılanıb. ..
20.09.2017 14:06
Muğam Mərkəzində kamera musiqisi axşamı -“İki qəlbin dastanı”Heydər Əliyev Fondu və Mədəniyyət və Turizm Nazirliyinin təşkilatçılığı ilə keçirilən Üzeyir Hacıbəyli IX Beynəlxalq Musiqi Festivalı davam edir. Festival çərçivəsində sentyabrın 19-da Beynəlxalq Muğam Mərkəzində “İki qəlbin dastanı” adlı kamera musiqisi gecəsi keçirilib. Aleksey Miltıx (cello) və Səidə Tağızadənin (piano) çıxış etdiyi gecədə Fikrət Əmirovun “2 pyes”, Fərhad Bədəlbəylinin “Şuşa”, Dmitri Şostakoviçin “Violonçel və fortepiano üçün sonata”, Jül Massnenin “Düşüncə”, Yulius Klengelin “Skertso”, Sergey Raxmaninovun “Vokaliz” əsərləri səsləndirilib. Konsert proqramı klassik musiqisevərlər tərəfindən alqışlarla qarşılanıb.    * * * Festival çərçivəsində daha bir konsert proqramı Kamera və Orqan Musiqisi Zalında gerçəkləşib. “D`ACCORDO” ansamblının təqdim etdiyi “Barokko və Renessans” adlı konsertin solistləri Fəridə Məmmədova (soprano), Səbinə Əsədova (mezzo-soprano) və bədii rəhbəri İlahə Sadıqzadə (piano) idi.    * * * Azərbaycan Dövlət Filarmoniyasında isə Novosibirsk Filarmonik Kamera Orkestri (dirijor - Əməkdar artist Əyyub Quliyev, solistlər - Rusiyanın Əməkdar artisti Yuliya Rubina (violin) və Riyad Məmmədov (piano) çıxış edib.  Üzeyir Hacıbəyli IX Beynəlxalq Musiqi Festivalı sentyabrın 18-dən 26-dək davam edəcək. ..
20.09.2017 12:56
“Müasir dövrdə Üzeyir Hacıbəylinin səhnə əsərlərinin geniş coğrafiyası” mövzusunda elmi konfrans keçirildiSentyabrın 19-da Üzeyir Hacıbəyli IX Beynəlxalq Musiqi Festivalı çərçivəsində Azərbaycan Bəstəkarlar İttifaqında “Müasir dövrdə Üzeyir Hacıbəylinin səhnə əsərlərinin geniş coğrafiyası” mövzusunda elmi konfrans keçirildi.   Konfransda ittifaqın sədri, Xalq artisti Firəngiz Əlizadə çıxış edərək dahi bəstəkarın həyat və yaradıcılığından, milli musiqimizin inkişafında xidmətlərindən söz açdı. Bildirdi ki, Üzeyir bəyin yaradıcılığı tükənməz bir xəzinədir. Onun əsərlərinin coğrafiyası gündən-günə genişlənir, yeni tədqiqat işləri aparılır və bu iş hər zaman aktual olaraq qalacaq.  Qeyd olundu ki, görkəmli bəstəkarın əsərləri hər zaman dünya xalqlarının da diqqət mərkəzində olub. Hələ sovet dövründə dünyanın 136 ölkəsində nümayiş olunan, 75 dilə tərcümə edilmiş “Arşın mal alan” kinokomediyası bu gün də tamaşaçılar tərəfindən maraqla izlənilir: “Üzeyir bəy Azərbaycan musiqisində köklü dönüş yaratmış dahi bəstəkardır. O, şifahi xalq musiqi sənəti şəklində mövcud olan Azərbaycan milli musiqisini Qərbi Avropa bəstəkarlıq məktəblərinin nailiyyətləri, forma və janrları ilə zənginləşdirib, Azərbaycan və ümumiyyətlə, Şərq musiqisinin gələcək inkişaf perspektivlərini, estetik prinsiplərini müəyyənləşdirib”.  Vurğulandı ki, Ü.Hacıbəyli həm də böyük musiqişünas alim idi. O, müasir Azərbaycan musiqişünaslığının əsasını qoyub, musiqiyə dair tədqiqatlar aparıb, çoxlu məqalələr yazıb. Konfrans dahi bəstəkarın irsinə dair elmi məruzələrlə davam etdi. Əməkdar incəsənət xadimləri - Həcər Babayeva “Leyli və Məcnun” operası Bilkənd səhnəsində”, Hafiz Quliyev “Arşın mal alan” operettası xarici teatrların səhnəsində”, professor Cəmilə Həsənova “Əsli və Kərəm” operasının səhnə taleyi”, sənətşünaslıq üzrə fəlsəfə doktoru Jalə Qulamova “Koroğlu” operasının TÜRKSOY xətti ilə səhnəyə qoyulması”, dosent Güllü İsmayılova “Arşın mal alan” filmi: yaranma tarixi və ekran həyatı”, Əməkdar incəsənət xadimi Nərgiz Şəfiyeva “Üzeyir Hacıbəylinin “Arşın mal alan” operettasının Vyana Musiqili Teatrında tamaşasına daha bir nəzər”, professor Könül Nəsirova “Leyli və Məcnun” operasının Amerika səhnəsində balet təcəssümü” mövzularında məruzə etdilər. Bildirildi ki, hazırda Belarus və Çin səhnəsində oynanılan “Arşın mal alan” dünya tamaşaçıları üçün tələb olunan əsərlərdən biridir. Bu əsəri çinlilər hələ 1959-cu ildə səhnələşdiriblər. Həmin aktyorlardan və tamaşaçılardan bu gün sağ olanlar əsəri sevdiklərini dönə-dönə dilə gətirirlər. Bu, Üzeyir dühasının ölməzliyi, möhtəşəmliyidir.  Diqqətə çatdırıldı ki, bəstəkar “Arşın mal alan”ı 1913-cü ildə Sankt-Peterburq Konservatoriyasında oxuyarkən yazıb. O, operettanı tamamladıqdan sonra ilk dəfə konservatoriyanın direktoru, görkəmli rus bəstəkarı A.Qlazunova göstərib. Qlazunov əsəri çox bəyənib. Bundan sonra Üzeyir bəy əsərin partiturasını və librettosunu Bakıya, dostlarına göndərib. Ötən müddətdə “Arşın mal alan” dünyanın üç qitəsini dolaşıb. “Arşın mal alan” kinokomediyası (1945) Azərbaycanla yanaşı, sovet kinosuna da dünya şöhrəti qazandırıb. Xarici filmlər arasından seçilən “100 sevimli film” içərisində “qızıl siyahı”ya daxil edilib.  ..
19.09.2017 17:15
Opera və Balet Teatrında Cüzeppe Verdinin “Traviata” operasının tamaşası keçiriləcəkdirSentyabrın 27-də Azərbaycan Dövlət Akademik Opera və Balet Teatrında Cüzeppe Verdinin “Traviata” operasının tamaşası keçiriləcəkdir. Tamaşada əsas partiyalarda Teatrın aparıcı solistləri - Əməkdar Artistlər  İnarə Babayeva (Violetta), Fərid Əliyev (Alfred), Cahangir Qurbanov (Jermon),  Əkrəm Poladov  (Doktor Qrevil),  Xalq Artisti, Vokalçıların Bülbül adına adına I müsabiqəsinin Qran-Pri mükafatçısı Əli Əsgərov (Markiz d`Obinyi) və Nina  Makarova (Flora) çıxış edəcəklər. Opera tamaşasını Əməkdar artist, dirijorların beynəlxalq müsabiqələrinin və milli “Humay“ mükafatının laureatı Əyyub Quliyev idarə edəcəkdir. ..
19.09.2017 16:01
Opera və Balet Teatrında dünya Adolf Adanın “Jizel” baletinin tamaşası nümayiş olunacaqdırSentyabrın 30-da  Azərbaycan Dövlət Akademik Opera və Balet Teatrında dünya Adolf Adanın “Jizel” baletinin tamaşası nümayiş olunacaqdır.  Klassik opera və balet tamaşalarına adlı-sanlı vokal və balet ulduzlarını dəvət etməklə tamaşaçıları sevindirməyə çalışan Teatr bu mövsümdə də öz faydalı ənənəsinə sadiqdir. Bu dəfə Bakı Teatrının qonaqları Ukraynalı sənətçilər - Tatyana Qolyakova və Sergey Dosenkodur. Y.Qolyakova tamaşada Jizel partiyasını ifa edəcəkdir. Tatyana Ukrayna Milli Operasının prima-balerinası, Ukraynanın Xalq artistidir, bir sıra beynəlxalq balet müsabiqələrinin laureatıdır. Onun tərəf-müqabili, qraf Albert partiyasını isə Odessa Opera və Balet Teatrının aparıcı solisti, Ukraynanın Əməkdar artisti, beynəlxalq müsabiqələr laureatı Sergey Dosenko ifa edəcəkdir. Tamaşada həmçinin balet truppasının solistləri - Elmira Süleymanova, Əməkdar artistlər Alsu Qimadiyeva və Makar Ferştandt çıxış edəcəklər. Tamaşanın dirijoru  Xalq Artisti, professor Cavanşir Cəfərovdur. ..
19.09.2017 12:27
Heydər Əliyev Sarayında “Bir ömrə bərabər məktəb illəri” adlı konsert proqramı keçiriləcəkHeydər Əliyev Sarayında 2017-ci ilin oktyabrın 8-də “Bir ömrə bərabər məktəb illəri” adlı musiqili-əyləncəli konsert proqramı təqdim olunacaq. Uşaqların marağına səbəb olacaq konsertdə milli və müasir rəqslər, vətənpərvərlik mövzusunda mahnılar və şeirlər, muğam və aşıq ifaları, rəngarəng çıxışlar və digər sürprizlər gözlənilir. Saat 13:00 –da başlayacaq konsertin biletlərini www.iticket.az saytından onlayn, şəhərin kassalarından və ASAN xidmət mərkəzlərindən əldə edə bilərsiniz. Əlaqə nömrələri: (012) 441-21-31, (050) 332-36-30 ..
19.09.2017 12:24
Uşaq bağçalarında mütaliə saatları təşkil olunur Bakı Şəhər Mədəniyyət və Turizm Baş İdarəsinin şəbəkəsinə daxil olan Mərkəzləşdirilmiş Kitabxana Sistemləri və filialları müntəzəm olaraq uşaq  bağçalarında görüşlər, söhbətlər, məlumat və nağıl saatları təşkil edirlər. Bağça yaşlarında uşaqlar üçün belə tədbirlərin keçirilməsi onların kitabxanaya, mütaliəyə marağını artırır və gələcəkdə kitab oxumaları üçün sağlam təməl yaradır. Təşkil olunmuş nağıl saatlarında kitabxana işçiləri tərəfindən uşaqlara “Sehirli Torba”, “Çırtdan”, “İki sehirli sandıq”, “Qızıl qaz”, “Tıq tıq xanım”, “Məlikməmməd” və digər Azərbaycan və dünya xalq nağılları oxunur. Nağılların tərbiyəvi əhəmiyyəti uşaqlara aşılanır, onlar bir neçə dəqiqəlik də olsa ətraf aləmdən ayrılıb nağıl qəhrəmanlarının dünyasına səyahət edirlər. Həmçinin, uşaqlar arasında bir-birindən maraqlı viktorinalar, oyunlar təşkil olunur və onlara kitablar hədiyyə olunur. ..