Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
22.11.2017 17:43
Musiqili Teatrda İlham Namiq Kamalın iştirakı ilə “Qafqazlı qardaşqızı”Azərbaycan Dövlət Musiqili Teatrında SSRİ Xalq artisti, məşhur bəstəkar Rauf Hacıyevin “Qafqazlı qardaşqızı” operettası növbəti dəfə nümayiş olunacaq. Bu dəfəki nümayişin özəlliyi Azərbaycan Respublikasının Xalq artisti, “Şöhrət” ordenli İlham Namiq Kamalın tamaşada iştirakı ilə bağlıdır. Belə ki, məşhur səhnə əsərində İlham Namiq Kamal baş rolu – Bəbirli obrazını canlandıracaq. Tamaşanın nümayişi 24 noyabr saat 19.00-da baş tutacaq. “Musiqili teatrın rus bölməsi tərəfindən hazırlanan bu məşhur operettada ilk dəfə səhnəyə çıxacağam. Bəbirli çox xarakterik bir obrazdır. Kaloritli olduğu qədər də özünəməxsus düşüncə tərzinə malikdir. Rauf Hacıyevin möhtəşəm musiqisi isə şedevrdir. Bir məqamı xüsusi qeyd etmək istərdim, peşəkar aktyor üçün dil faktoru yoxdur. Əsas aktyorun plastikası, məharəti, oynadığı obrazı doğru-düzgün təqdim etmək bacarığına sahib olmasıdır. İnanıram ki, tamaşaçılar mənim ifamda Bəbirlini sevəcəklər”, - deyə İlham Namiq Kamal bildirib. Qeyd edək ki, beynəlxalq layihə kimi teatrın tarixinə yazılan tamaşanın quruluşçu rejissoru Əməkdar incəsənət xadimi Əli Usubov, quruluşçu dirijoru Əməkdar incəsənət xadimi Nazim Hacıəlibəyov, quruluşçu rəssamı Moskvadan dəvət olunmuş Rusiya Rəssamlıq Akademiyasının həqiqi üzvü, professor Dmitri Çerbadji, quruluşçu baletmestrləri Əmdar artist Zakir Ağayev və Leyla Ağayevadır. Tamaşada rolları Əməkdar artistlər Boris Qrafkin, Svetlana Bulax, Səidə Şərifəliyeva, aktyorlar Firuz Məmmədov, Yuliya Heydərova, Rauf Babayev, Nicat Əli və Əliməmməd Novruzov ifa edirlər. ..
22.11.2017 17:39
Fəxri xiyabanda Fikrət Əmirovun xatirəsi anıldı  Görkəmli bəstəkar, ictimai xadim, SSRİ Xalq artisti, Dövlət mükafatları laureatı Fikrət Əmirovun (1922-1984) anadan olmasının 95 ili tamam olur. Bu münasibətlə noyabrın 22-də, sənətkarın doğum günündə Fəxri xiyabanda məzarı önündə anım mərasimi keçirildi. Mədəniyyət və incəsənət xadimləri, bəstəkarın ailə üzvləri məzarın üzərinə gül-çiçək dəstələri qoyaraq sənətkarın xatirəsini ehtiramla yad etdilər. Anım mərasimində çıxış edən Bəstəkarlar İttifaqının sədri, Xalq artisti, professor Firəngiz Əlizadə vurğuladı ki, yaradıcılığı zəngin milli köklərə əsaslanan Fikrət Əmirov Azərbaycan musiqisinin yeni mərhələdə inkişafını təmin edən şəxsiyyətlərdəndir. Onun simfonik muğam və muğam-poema janrlarında olan əsərləri Azərbaycanın özünəməxsus musiqi mədəniyyətinin mövcudluğundan xəbər verir. Bakı Musiqi Akademiyasının rektoru, professor Fərhad Bədəlbəyli qeyd etdi ki, Fikrət Əmirovun yaratdığı zəngin musiqi əsərləri Azərbaycan musiqi mədəniyyətinin inkişafında xüsusi mərhələ təşkil edir. Bəstəkarın bacısı Şəfiqə Daşdəmirova sənətkarın xatirəsini əziz tutan insanlara, yubileylə bağlı mədəniyyət tədbirlərinin təşkilatçılarına minnətdarlığını bildirdi. Vurğuladı ki, bəstəkarın bütün yaradıcılığı onun doğma torpağına və milli ruhuna bağlı idi. Fikrət Əmirovun oğlu, məşhur caz musiqiçisi, Əməkdar incəsənət xadimi Cəmil Əmirov anım mərasiminə gələnlərə öz minnətdarlığını bildirdi. Qeyd edək ki, Fikrət Əmirov 1922-ci il noyabrın 22-də Gəncədə anadan olub. Onun simfonik muğamları və “Nizami” simfoniyası dünyanın ən məşhur dirijorlarından G.Rojdestvenski (Rusiya), K.Abendrot (Almaniya), Ş.Münş (Fransa) və L.Stokolovskinin (ABŞ) bədii rəhbərliyi ilə ifa olunub. Görkəmli dramaturq Cəfər Cabbarlının pyesi əsasında yazdığı “Sevil” operası ilə o, Azərbaycanda lirik-psixoloji operanın əsasını qoyub. Bəstəkar həmçinin musiqi mədəniyyətimizə konsert janrının da yaradıcısı kimi daxil olub. Yaratdığı simfonik muğam janrı “Şur”, “Kürd Ovşarı” və “Gülüstan Bayatı-Şiraz” kimi dəyərli əsərlərlə təmsil olunub. “Nizami” simfoniyası, doğma vətəni tərənnüm edən “Azərbaycan kapriççiosu”, “Azərbaycan süitası”, “Azərbaycan qravürləri” sənətkarın zəngin irsinin dəyərli səhifələrini təşkil edir. Fikrət Əmirov SSRİ və Azərbaycanın dövlət mükafatlarına, SSRİ Xalq artisti və Sosialist Əməyi Qəhrəmanı fəxri adlarına layiq görülüb. Bəstəkar 1984-cü ildə vəfat edib. Hazırda Azərbaycan Dövlət Mahnı və Rəqs Ansamblı görkəmli musiqiçinin adını daşıyır.             ..
22.11.2017 17:39
Azərbaycan Misirin Qahirə şəhərində keçirilən konfransda təmsil olunur20 noyabr 2017-ci il tarixində Misir Milli Kitabxanası və Arxivlər İdarəsinin nəznindəki Uşaq Ədəbiyyatı Sənədləşdirilməsi və Araşdırılması mərkəzinin təşkil etdiyi, “ Əsrlər boyu Ərəb dünyasında uşaq ədəbiyyatı “ adlı konfransda, Azərbaycan Respublikası Mədəniyyət və Turizm Nazirliyinin dəstəyi ilə F.Köçərli adına Respublika Uşaq Kitabxanasının təşkil etdiyi “Misir nağılları Azərbaycan uşaqlarının gözü ilə “ adlı rəsm sərgisi ilə iştirak edirdi. Tədbirdə, Ərəb ölkələrinin ziyalıları, uşaq kitabxanalarının  rəhbərləri,  uşaq yazarları, uşaq ədəbiyyatının tədqiqatçı alimləri və s. nümayəndələr  iştirak edirdilər. 2-ci Beynəlxalq  konfrans İordaniya, Küveyt, Marokko,  Livan,  Fələstin,  Səudiyyə Ərəbistan,  Birləşmiş Ərəb Əmirlikləri kimi bir çox müxtəlif dövlətlərdən qatılmışdılar.  Konfrans  Azərbaycanlı uşaqların Misir nağıllarına çəkdikləri rəsm sərgisinin nümayişi  ilə başladı. Sərgidə 30 nağıl əsasında çəkilmiş, 30 rəssam uşaqların 51 rəsm əsəri təqdim olundu. Sərgi Ərəb dünyasının uşaq ədəbiyyatı ilə məşğul olan  mütəxəssisləri tərəfindən  böyük rəğbətlə  qarşılandı. Tədbiri Misir Milli kitabxanasının direktoru Dr.Nader  Abdeldayem açaraq,  gələn qonaqları və tədbir iştirakçilarını ürəkdən salamlayaraq, Misir Milli Kitabxanası və  Arxivlər İdarəsinin sədri professor Əhməd Seyyid Məhəmməd Şövqinin salamlarını iştirakçı qonaqlara çatdırdı.  Daha sonra söz Uşaq Sənədləşdirilməsi və Tədqiqatları Mərkəzinin direktoru Xanım İman ABD Al  Əzizə verildi. O da öz növbəsində tədbir iştirakçılarını salamlayıb, konfrans iştirakçılarına uğurlar arzuladı. Tədbir Ərəb ölkələrinin görkəmli nümayəndələrinin çıxışları ilə davam etdi. Sonra söz, F.Köçərli adına Respublika Uşaq Kitabxanasının direktoru Ş.Qəmbərovaya verildi. O, “Misir nağılları Azərbaycanlı uşaqların gözü ilə” adlı məruzə ilə çıxış etdi. Bildirdi ki, nağıllar şifahi xalq ədəbiyyatının ən çox sevilən janrlarından biridir. Qəmbərova, dünya ədəbiyyatının xalq nağıllarına xas olan ortaq xüsusiyyətlərindən geniş söhbət açaraq,  Misir nağıllarının özünə məxsusluğunu qoruyaraq öz inkişaf dövrünü keçdiyini və bu nağıllarda onların öz milli adət və ənənələri ilə yanaşı köklərinə bağlılıqlarınında əks olunduğunu vurğuladı. O, çıxışında  layihə  haqqında söhbət açıb, Misir nağıllarından 30 nağılın Ərəb dilindən Azərbaycan dilinə tərcümə olunaraq yaxın vaxtlarda çap olunacağı barədə genış məlumat verdi.  Qəmbərova çıxışının sonunda Misir Uşaq Ədəbiyyatı Sənədləşdirilməsi və Araşdırmaları Mərkəzləri ilə F.Köçərli  adına Respublika Uşaq Kitabxanasının mədəni və ədəbi əlaqələri üçün bundan sonrada bir çox layihələrin həyata keçirilməsi istiqamətində əlindən gələni əsirgəməyəcəyini xüsusi ilə qeyd etdi. ..
22.11.2017 17:09
Həkim-yazıçı Asif Kəngərlinin kitablarının təqdimatı keçirilibNoyabrın 21-də Bakı Şəhər Mədəniyyət və Turizm Baş İdarəsinin təşkilatçılığı ilə Yasamal rayon Heydər Əliyev Mərkəzində həkim-yazıçı Asif Kəngərlinin kitablarının təqdimat mərasimi keçirilib. Narkomanlığa qarşı mübarizəyə dair işlərin görülməsi, əhalinin və xüsusilə gənclərin bu istiqamətdə maarifləndirilməsi məqsədilə keçirilən tədbirdə yazıçının “Tütünçəkmə barədə hər şey“, “Alkoqol-sağlam həyat tərzinin düşməni“ və “Narkotik-maddə ailəvi qırğın silahı“ adlı kitablarının təqdimatı baş tutub. Tədbirdə millət vəkili Fazil Mustafa, əməkdar artist Eldost Bayram, “Aqra” Elmin İnkişafına Dəstək İctimai Birliyinin sədri Mirələkbər Seyidov Bakı Şəhər Mədəniyyət və Turizm Baş İdarəsinin əməkdaşları və başqaları iştirak ediblər. Həkim-yazıçı Asif Kəngərli alkoqolizm və narkotikin insan orqanizminə ziyanlarından, onunla necə mübarizə aparmağın yollarından, zərərli olduğu bilindiyi halda niyə sürətlə artdığının səbəblərindən söhbət açıb. Çıxış edənlər dövrümüzün aktual, ağrılı problemi olan narkomaniya və onun fəsadları, ona qarşı mübarizə yolları ilə bağlı əhali, xüsusən də gənc nəsil arasında maarifləndirmə, təbliğat işlərinin aparılması, bu mövzuda kitabların rolu və mütəmadi olaraq belə tədbirlərin keçirilməsinin vacibliyini vurğuluyublar. Sonda Asif Kəngərlinin müəllifi olduğu “Bəla” pyesindən fraqmentlər nümayiş olunub. ..
21.11.2017 17:52
“F.Əmirovun əsərlərini ifa və təhlil edirik” adlı II elmi-ifaçılıq konfransıNoyabrın 22-də Bakı Şəhər Mədəniyyət və Turizm Baş İdarəsinin F.Əmirov adına 6 nömrəli İncəsənət Məktəbində böyük Azərbaycan bəstəkarı F.Əmirovun anadan olmasının 95, adını daşıdığı məktəbin təsis olmasının 55 illik yubileyinə həsr olunmuş “F.Əmirovun əsərlərini ifa və təhlil edirik” adlı şagirdlərin II elmi-ifaçılıq konfransı keçirilib. Tədbirdə Bakı şəhər Mədəniyyət və Turizm Baş İdarəsinin  Musiqi təhsili və incəsənət sektorunun  baş məsləhətçisi Mehriban Qurbanova, Binəqədi Rayon Gənclər və İdman İdarəsinin müdir müavini Sevinc Süleymanova, Binəqədi rayonu YAP-nın sədri Ramiz Göyüşov, Binəqədi Rayon İcra Hakimiyyətinin səlahiyyətli nümayəndələri, professor,  əməkdar incəsənət xadimi, Azərbaycan Rəssamlar və Memarlar İttifaqının üzvü  Elturan Avalov, eləcədə Bakı şəhər musiqi məktəblərinin direktorları iştirak ediblər. 2016-cı ildə keçirilmiş “Min bir gecə uşaqların gözü ilə” ilk  konfransdan fərqli olaraq “ F.Əmirov mövzusuna yeddi eskiz” adlı bu dəfəki konfransda bəstəkarın əsərlərinin müxtəlif ansambllar üçün işləmələri yer almışdır. Məktəbin daha geniş planda həyata keçirilmiş bu layihəsinə Niyazi adına 22 saylı uşaq musiqi məktəbinin şagirdləridə qatılıblar. Konfrans çərçivəsində F.Əmirovun  “Sevil “operasından vals fortepiano ansamblının, “Aslanın mahnısı” skripkaçılar triosunun, “Göygöl“ mahnısı qanun kvartetinin, “Azərbaycan dağlarında” və “Aşıqsayağı” əsərləri fleyta və klarnetin duetində, “Min bir gecə” baletindən iki nömrə kamançaların dueti və tarın ifasında şagirdlərin özü tərəfindən təhlil olunaraq ifa edilib. Tədbirin sonuncu nömrəsi məktəbin xalq çalğı alətləri orkestrinin ifasında təqdim olunan bəstəkarın  “Gözünaydın “ musiqili komediyasından  “Rəqs” nömrəsi olub.  Elmi-ifaçılıq konfransının sonunda məktəbin direktoru, əməkdar müəllim, professor Adilə Yusifova iştirak edən bütün qonaqlara minnətdarlığını bildirib.     ..
21.11.2017 11:07
YUNESKO-da almanların Azərbaycana gəlişinin 200 illiyinə həsr edilən sərgi keçirilib Parisdə YUNESKO-nun baş qərargahında Azərbaycan Respublikasının Mədəniyyət və Turizm Nazirliyi və ölkəmizin YUNESKO yanında daimi nümayəndəliyinin almanların Qafqaza gəlişinin 200 illiyi münasibətilə birgə təşkil etdiyi sərginin açılış mərasimi olub. Azərbaycanın Fransadakı səfiri Rəhman Mustafayev, YUNESKO yanında müxtəlif ölkələrin səfirləri, tanınmış incəsənət və mədəniyyət xadimləri, ictimaiyyət nümayəndələri sərginin açılış mərasimində iştirak ediblər. Azərbaycanın YUNESKO yanında daimi nümayəndəliyin rəhbəri, səfir Anar Kərimov sərginin müxtəlif mədəniyyət və dinlər arasında sülh, dialoq və qarşılıqlı hörmətin əhəmiyyətinə dair vacib mesaj olduğunu bildirib. O, almanların memarlıq, sənaye, kənd təsərrüfatı və şəhərsalma sahəsinə verdikləri töhfələrə toxunub. Almanların ölkəmizə gəlişinin tarixindən, xalqımızın tolerantlıq mədəniyyəti sayəsində onların yerli mühitə asanlıqla inteqrasiya etməsindən söz açıb. Bildirib ki, dini ayinlərini azad şəkildə həyata keçirən almanlar ölkəmizdə bir neçə kilsə də tikiblər. Hökumətimiz ölkədə yaşayan bütün milli və dini azlıqlara lazımı şərait yaradılması üçün zəruri tədbirlər görüb. Azərbaycanın YUNESKO-ya üzvlüyünün 25 illiyindən söz açan səfir dövlət müstəqilliyini bərpa edən ölkəmizin elə ilk gündən xarici işğala məruz qaldığını diqqətə çatdırıb. İqtisadi və humanitar çətinliklə üzləşən Azərbaycanın bütün çətinliklərə sinə gərdiyini və humanitar yardım alan ölkədən humanitar yardım edən ölkəyə çevrildiyini qeyd edib. Ölkəmizin YUNESKO-nun layihələrinə maliyyə dəstəyindən danışıb. Mədəniyyətlərarası dialoq sahəsində Azərbaycanla YUNESKO arasında mühüm əməkdaşlıqdan söz açaraq, ölkəmizin mədəniyyətlər və dinlərarası dialoqa verdiyi töhfələri diqqətə çatdırıb. Qeyd edib ki, Azərbaycanda müxtəlif xalqların və dinlərin nümayəndələri bir ailə kimi mehriban yaşayır. İki ildən bir ölkəmiz Ümumdünya Mədəniyyətlərarası Dialoq Forumuna və Bakı Beynəlxalq Humanitar Forumuna ev sahibliyi edir. Mədəniyyətlərarası dialoqu təşviq etmək məqsədi ilə Azərbaycan Prezidenti İlham Əliyev tərəfindən “Bakı Prosesi” təşəbbüsü irəli sürülüb və gələn il onun 10 illiyinin qeyd edilməsi ilə bağlı Sərəncam imzalanıb. YUNESKO-nun baş direktorunun xarici əlaqələr və ictimai informasiya üzrə köməkçisi Erik Falt sərginin Azərbaycanı yaxından tanımağa imkan verdiyini bildirib. O, Azərbaycanı YUNESKO-ya üzv olmasının 25 illiyi münasibəti ilə təbrik edib. Ölkəmizin mədəniyyətlər və dinlərarası dialoqa töhfəsindən danışıb. Mədəniyyət və turizm nazirinin müavini Sevda Məmmədəliyeva almanların ölkəmizə gəlişinin tarixindən, alman mədəni irsinin qorunub saxlanmasından söz açıb. Bildirib ki, Azərbaycan Prezidenti Cənubi Qafqaz regionunda alman məskənlərinin salınmasının 200 illiyi haqqında Sərəncam imzalayıb. Yubiley münasibətilə Berlin Humboldt Universitetində, Bakıda və Şamaxıda sərgilər təşkil olunub. Sonra tədbir iştirakçıları gənc pianoçu Etibar Əsədli və Vurğun Vəkilovun ifasında səsləndirilən Azərbaycan və alman bəstəkarlarının klassik musiqi sədaları altında sərgi ilə tanış olub və fikir mübadiləsi aparıblar. Sonda Erik Falt bildirib ki, Azərbaycanı yaxından tanımağa imkan yaradan sərgi alman təsirinin müxtəlif aspektlərini də əks etdirir. “Sərgi ölkənizin multikultural olduğunu bir daha təsdiqləyir. Müxtəlif xalqların harmoniyada yaşadığından xəbər verir ki, bu da YUNESKO-nun bəşəriyyətə verdiyi mesajla üst-üstə düşür”, - deyə E.Falt vurğulayıb. Qeyd edib ki, Azərbaycan YUNESKO–nun fəal tərəfdaşıdır və mədəniyyətlər arası dialoqun təşviqinə böyük töhfələr verib. ..
21.11.2017 10:25
İstanbulda TÜRKSOY-un baş katibinin yubileyinə həsr edilən konsert olub İstanbulun Maltəpə Universitetində Beynəlxalq Türk Mədəniyyəti Təşkilatının (TÜRKSOY) baş katibi, professor Düsen Kaseinovun 70 illik yubileyi münasibətilə konsert olub. Qazaxıstanın Karaqanda Simfonik Orkestri Azərbaycan, Qırğızıstan, Özbəkistan, Türkiyə, Türkmənistan, Rusiya Federasiyasının Başqırdıstan və Tatarıstan respublikalarından və Sankt-Peterburq şəhərindən qatılan musiqiçilərlə birgə geniş konsert proqramı təqdim edib. “Dostlarım zənginliyimdir” adlı proqram əsasında keçirilən konsertdə yubilyar bir neçə ifa ilə orkestri skripkada müşayiət edib. D.Kaseinovun 70 illik yubileyi münasibətilə Türkiyənin Bolu və Bursa şəhərlərində də konsertlər təşkil ediləcək. Yubiley mərasimi isə Ankara şəhərində keçiriləcək. ..
21.11.2017 10:21
Sankt-Peterburqda Beynəlxalq Mədəniyyət Forumu başa çatıb Sankt-Peterburqda Beynəlxalq Mədəniyyət Forumu öz işini başa çatdırıb. Forum çərçivəsində şəhərin 167 məkanında 450 tədbir keçirilib. Üç gün ərzində yüzlərlə görüş keçirilib, xeyli beynəlxalq saziş imzalanıb. Rusiya Prezidenti Vladimir Putin forumun açılışında qeyd edib ki, mədəniyyət forumunun xüsusi əhəmiyyəti incəsənətin sərhəd tanımağını göstərməyindədir. Rusiya Prezidenti deyib: “Siz heç bir tərcümə tələb etməyən incəsənətin dilində danışırsınız. Sizin istedadınız, qəlb genişliyiniz, peşəkarlığınız qurub-yaratmağa və xeyirxahlığa sövq edir, dünyamıza ruh yüksəkliyi bəxş edir, onu nəcibliklə və güclü mənəviyyatla zənginləşdirir. Təsadüfi deyildir ki, incəsənət xadimləri - rəssamlar, şairlər, aktyorlar, musiqiçilər cəmiyyətdə böyük nüfuz sahibidirlər”. Bütün aktual məsələlərin müzakirəsinə şərait yaratmağın əhəmiyyətini vurğulayan V.Putin fikrini belə tamamlayıb: “Bu məsələlər Sankt-Peterburqda Beynəlxalq Mədəniyyət Forumunda da qaldırılıb. Əminəm ki, bu forumun iştirakçıları olan və mədəniyyət sahəsinin bütün palitrasını əks etdirən sizlər müasir dövrün qarşımıza qoyduğu məsələlərə həmin görüşlərdə layiqli cavablar tapa biləcəksiniz”. Rusiyanın mədəniyyət naziri Vladimir Medinskinin Sankt-Peterburq Beynəlxalq Mədəniyyət Forumunun işi haqqında sözləri beynəlxalq dialoq üçün mədəniyyətin əhəmiyyətini bir daha təsdiq edib. Nazir deyib: “Biz görürük ki, forumumuz iştirakçıların və qonaqların sayına görə liderlər sırasındadır: 35 min iştirakçı, 1000 əcnəbi qonaq, yüzlərlə mədəniyyət və işgüzar tədbir. Bütün bunlar mədəniyyətə tələbatın olduğunu, onun hər bir sanksiya və maneəni asanlıqla dəf etdiyini göstərir”. Sankt-Peterburq Beynəlxalq Mədəniyyət Forumu altıncı dəfə keçirilib, bu il Qazaxıstana və Yaponiyaya qonaq ölkələr statusu verilib. Forumun Rusiyanın mədəniyyət paytaxtında keçirilməsini çox rəmzi hal sayan Azərbaycan nümayəndə heyətinin üzvü, Mədəniyyət və Turizm Nazirliyinin elm, təhsil və gənclərlə iş şöbəsinin baş məsləhətçisi Vüqar Baxışov deyib: “Sankt-Peterburq sadəcə açıq səma altında çox gözəl muzeydir. Elə ilk təəssüratlarımız çox yüksəkdir. Forumun belə bir gözəl şəhərdə keçirilməsi onun bütün iştirakçılarını daha da ruhlandırır, onlara müsbət enerji bəxş edir. Məqsədimiz birdir - mədəniyyətə xidmət etmək. Hər kəs öz milli mədəniyyətinə xidmət edir. Hamımız birlikdə isə dünya mədəniyyətinə töhfə veririk. Müxtəlif xalqların və mədəniyyətlərin nümayəndələrinin görüşməsinə şərait yaratdığına görə Rusiyaya təşəkkür edirik. Mən təkcə bu forumdan deyil, mədəniyyət, gənclər siyasəti və digər sahələrdə Rusiyada keçirilən başqa tədbirlərdən də danışıram. İnsanları bir araya gətirmək, onlara dinc yanaşı yaşamağı, inkişaf etməyi və yeni-yeni zirvələr fəth etməyi öyrətmək üçün bütün vasitələri işə salmaq lazımdır”. Sankt-Peterburq Forumunun müasir cəmiyyət haqqında sorğuya real cavab olduğunu vurğulayan digər azərbaycanlı nümayəndə, tanınmış kinorejissor Ayaz Salayev deyib: “Buna bənzər başqa tədbirlər kimi, bu mədəniyyət forumu da elə bir dərin təşvişin qanunauyğun nəticəsidir ki, hazırda dünya ümumiyyətlə müasir mədəniyyətin vəziyyəti, bəşəriyyətin dünyaya münasibətinin ifadə olunması funksiyasını mədəniyyətin heç də həmişə öz üzərinə götürmədiyi xüsusunda bunu hiss edir. Bəşəriyyət özünün yaşadığı dövrə mədəniyyət vasitəsilə hökm verir. İndi onun yerinə ala-babatlıq gəlir, şəxsiyyət isə gedir. Mədəniyyət forumu ala-babatlığa, səthiliyə bir cavabdır. Nə yaxşı ki, onunla heç kəs barışmayıb və bu da çox gözəl haldır”. Rusiya Dövlət Dumasının deputatı, Rusiya-Azərbaycan parlamentlərarası dostluq qrupunun rəhbəri Dmitri Savelyev bildirib ki, Sankt-Peterburq Beynəlxalq Mədəniyyət Forumu mühüm dövlətlərarası kommunikasiya vasitələrindən biridir. O deyib: “Mədəni dialoq sivil cəmiyyətdə münasibətlər qurmağın əsasıdır. Məsələn, tarixən Rusiya ilə Azərbaycan arasında çox mehriban dostluq münasibətləri yaranıb, o cümlədən mədəni mübadilə zəminində. Rusiyanın nə qədər mədəniyyət xadiminin – yazıçıların, şairlərin, musiqiçilərin və rəqqasların Qafqaz, xüsusilə Azərbaycan haqqında yeni əsərlər yaratmağa rahlandığını, bərəkətli Azərbaycan torpağının yetişdirdiyi nə qədər istedadlı insanın Rusiya mədəniyyətinə böyük təsir göstərdiyini bilirsinizmi? Bu dialoq əsrlərboyu davam edir, dövlətlərarası münasibətlər qurmaq üçün etibarlı zəmin yaradır. Mədəniyyət forumu belə əlaqələri yada salmaq, yeni əlaqələr qurmaq, bir-birini daha yaxından tanımaq və deməli, ölkələr arasında qarşılıqlı hörmət və mehriban qonşuluq prinsipləri əsasında qlobal münasibətlər qurmaq üçün gözəl imkandır”.   ..
20.11.2017 17:36
Belaruslu balet ulduzları "Don Kixot" baletinin tamaşasında çıxış edəcəklərUzun illərdən bəri Azərbaycan Dövlət Akademik Opera və Balet Teatrının repertuarında olan L.Minkusun “Don Kixot“ baleti noyabrın 25-də növbəti dəfə səhnəyə qoyulacaqdır. Baletsevərlərin çox böyük maraqla qarşıladıqları bu tamaşada əsas rolları ifa etmək üçün belaruslu balet ustaları - Aleksandra Çijik (Kitri) və Konstantin Qeronik (Bazil) dəvət olunmuşlar. Belarus Milli Akademik Opera və Balet Teatrının aparıcı solistləri olan hər iki gənc balet ulduzlarının bir sıra beynəlxalq müsabiqələrinin laureatlarıdır. Xüsusən Aleksandra Çijik bir çox ölkələrdə populyar olub Almaniya, Fransa, İsveçrə, İspaniya, Portuqaliya, İtaliya. Böyük Britaniya, ABŞ, Çin, Yaponiya, Meksika, Qvatemala, Yunanıstan və Kiprdə uğurla çıxış etmişdir. Tamaşada həmçinin balet truppamızın solistlərindən Əməkdar artistlər Makar Ferştandt və Samir Səmədov, habelə Elmira Süleymanova, Cəmilə Kərimova, Ayan Eyvazova və b. çıxış edəcəklər. Balet tamaşasınının dirijoru Əməkdar artist, dirijorların beynəlxalq müsabiqələrinin laureatı Əyyub  Quliyevdir. ..