Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
17.11.2017 11:13
Bakı Turizm İnformasiya Mərkəzi digər turizm informasiya mərkəzləri üçün reklam-təbliğat fəaliyyətinə dair tövsiyyələr hazırlayıbAzərbaycan Respublikası Mədəniyyət və Turizm Nazirinin 06.09.2017-ci il 205 saylı əmrinə əsasən Bakı Turizm İnformasiya Mərkəzi digər turizm informasiya mərkəzləri üçün metodiki mərkəz təyin olunmuşdur. Əmrin icrası ilə əlaqədar Bakı Turizm İnformasiya Mərkəzi reklam-təbliğat fəaliyyətinə dair xüsusi tövsiyyələr hazırlayıb və rayon turizm informasiya mərkəzlərinə təqdim etmişdir. Reklam-təbliğat fəaliyyətinə dair tövsiyyələrin aşağıdakı vasitələrlə aparılması nəzərdə tutulub: 1)Mobil və stasionar informasiya yerləşdirmə vasitələri-(stendlər, bilbordlar, nişanlar, bannerlər, rollaplar və s.) o cümlədən ixtisaslaşdırılmış köşklər; 2) Çap olunmuş turizm nəşrləri-flayer, buklet, bələdçi kitabı, xəritə; 3)Elektron nəşrlər-Turizm İnformasiya Mərkəzləri reklam-təbliğat fəaliyyəti ərzində sosial şəbəkənin (feysbuk, tvitter, instagram) bütün imkanlarından istifadə etməlidir. ..
16.11.2017 17:37
İstanbulda “Sən də Azərbaycanı gör” fotosərgisi davam edirÖtən ilin fevral ayından Azərbaycan Mədəniyyət və Turizm Nazirliyinin dəstəyi ilə Türkiyədə fəaliyyətə başlayan ölkəmizin turizm təmsilçiliyi - “Gateway” şirkəti tərəfindən turizm imkanlarımızın tanıdılması istiqamətində addımlar atılır. Mütəmadi olaraq qardaş ölkənin mətbuat səhifələrində Azərbaycanla bağlı yazılar dərc olunur, tanıtım layihələri icra edilir. Belə tədbirlərdən biri də “Sən də Azərbaycanı gör” devizi altında həyata keçirilən beynəlxalq fotosərgi layihəsidir. Sərginin keçirildiyi növbəti məkan İstanbulda “Cəvahir” AVM olub. Burada Azərbaycanın qədim tarixini, zəngin mədəniyyətini, əsrarəngiz təbiətini, turistik yerlərini, ölkəmizdə həyata keçirilən sosial-iqtisadi inkişafın göstəricilərini əks etdirən şəkillər nümayiş olunur. Mədəniyyət və Turizm Nazirliyinin qardaş ölkədəki turizm təmsilçiliyinin rəhbəri Nurlana Çakmak sərgi haqqında geniş məlumat verib. Bildirib ki, sərgidə böyük turizm potensialına malik Azərbaycana həsr olunmuş 30-dək foto nümayiş olunur: “Biz dost və qardaş ölkələrik. Sərgi ilə “sən də Azərbaycanı gör” deyirik və hər kəsi gözəl ölkəmizə dəvət edirik. Bu fotosərgi ilə Azərbaycanın fərqli yönlərini göstərmək istəyirik”. Sərgidə nümayiş olunan fotoşəkillər Azərbaycanın hotelçilik xidməti, mədəniyyəti, kurort bölgələri, sağlamlıq turizmi imkanları barədə ziyarətçilərdə aydın təsəvvür yaradır. Təqdim edilən Qız qalası, Şirvanşahlar sarayı, Heydər Əliyev Mərkəzi, İçərişəhər, eləcə də paytaxtımızın qədim və müasir arxitekturalı digər tikililəri, təbiət gözəllikləri və s. ziyarətçilər tərəfindən maraqla qarşılanıb. Sərgilər Türkiyə mətbuatında geniş işıqlandırılıb. Qeyd edək ki, “Gateway” şirkəti bundan əvvəl İstanbulun Yenikapı Metrosu, Topkapı Türk Dünyası Şəhərciyi, Türkiyənin Bilgi Universitetinin Santral İstanbul Kampusu  və s. məşhur məkanlarda da eyniadlı sərgilər təşkil edib. ..
16.11.2017 16:27
Sərhədkeçmə prosedurlarının sadələşdirilməsi və turistlər üçün viza verilməsi prosedurlarının asanlaşdırılması üzrə” İşçi Qrupunun növbəti iclası keçirilmişdirİşçi qrupunun cari ilin 15 noyabr tarixində keçirilən növbəti  iclasında Mədəniyyət və Turizm Nazirliyinin əməkdaşları ilə yanaşı Azərbaycan Respublikasının Nəqliyyat, Rabitə və Yüksək Texnologiyalar Nazirliyi, Xarici İşlər Nazirliyi, Dövlət Sərhəd Xidməti, Dövlət Gömrük Komitəsi, Dövlət Dəniz Administrasiyası, Azəravtoyol” Açıq Səhmdar Cəmiyyətinin və digər qurumların nümayəndələri iştirak etmişdir. İclasda “Azərbaycan Respublikasına turist axınının sürətləndirilməsi ilə bağlı əlavə tədbirlər haqqında” Azərbaycan Respublikası Prezidentinin 20 fevral 2017-ci il tarixli Sərəncamından irəli gələn məsələlərin icra vəziyyəti müzakirə edilmişdir. Belə ki, viza rejimi tətbiq olunmayan, ölkənin giriş məntəqələrində viza rəsmiləşdirilməsi mümkün olan və ASAN viza sistemi vasitəsi ilə rəsmiləşən ölkələrin siyahısını genişləndirilməsi və viza prosedurlarının asanlaşdırılması siyasətini davam etdirməsi istiqamətdə təkliflər, Mədəniyyət və Turizm Nazirliyinin əməkdaşları tərəfindən sərhəd buraxılış məntəqələrində aparılan müşahidələrə dair hazırladığı hesabatda əks edilmiş rəy və təkliflər, və bir sıra mühüm məsələlər işçi qrupun müzakirəsinə təqdim edilmiş, dövlət qurumlarının nümayəndələri tərəfindən müvafiq fikirlər səsləndirilmişdir.  İclasın yekunu olaraq bu istiqamətdə işlərin davam etdirilməsi üçün işçi qrupun üzvləri arasında mütəmadi olaraq məlumat mübadiləsinin aparılması, Asan Viza sistemi vasitəsi ilə viza verilən ölkələrin siyahısının genişləndirilməsi, həmçinin viza prosedurlarının asanlaşdırılması siyasətini davam etdirməsi istiqamətdə təkliflərin hazırlanması və digər məsələlərə dair qərarlar qəbul edilmişdir. ..
14.11.2017 00:00
ASAN Könüllüləri Təşkilatı ilə əməkdaşlığa dair memorandum imzalanıbAzərbaycan Turizm və Menecment Universiteti və ASAN Könüllüləri Təşkialtı arasında birgə əməkdaşlığa dair memorandum imzalanıb. ATMU-nun rektoru İlham Mədətov mərasim iştirakçılarını salamladıqdan sonra diqqətə çatdırıb ki, imzalanacaq sənədi niyyətin rəsmiləşdirilməsi kimi dəyərləndirə bilərik. Rektor qeyd edib ki,  “ASAN xidmət”in özünəməxsus hüquqi strukturu bir çox beynəlxalq tərəfdaşlar və ekspertlər tərəfindən yüksək qiymətləndirilir. Azərbaycan brendi olan “ASAN xidmət” “Dövlət xidmətlərinin çatdırılmasının yaxşılaşdırılması” kateqoriyasında BMT Mükafatının birinci yer üzrə qalibi seçilib. “ASAN xidmət”ə dünyada böyük maraq göstərildiyindən bir sıra dövlətlərin rəsmiləri ölkəmizə gələrək “ASAN xidmət”lərin fəaliyyəti ilə yaxından tanış olurlar. 2017-ci il 14 noyabr tarixində imzalanan Əməkdaşlıq memorandumunun əsas məqsədi Azərbaycan gənclərində təhsil və elm sahəsinə olan marağın artırılması, gənclərin şəxsi inkifına yönələn fəaliyyətlərə cəlb olunması ilə dövlət gənclər siyasətinə töhvə verilməsi, turizmin müxtəlif sahələri və istiqamətləri üzrə könüllülük fəaliyyətinin təşviq olunması sahəsində, o cümlədən 2017-ci il 15 sentyabr tarixli Azərbaycan Respublikası Prezidentinin Sərəncamı ilə təsdiq olunmuş “Azərbaycan gəncliyi 2017–2021-ci illərdə” Dövlət Proqramı”nın həyata keçirilməsi üzrə Tədbirlər Planından irəli gələn sahələrin icrası və digər qarşılqlı maraq kəsb edən sahələrdəki əməkdaşlığı əhatə edir. İmzalanan memoranduma əsasən, ASAN könüllüləri ATMU tərəfindən təşkil olunacaq yerli və beynəlxalq tədbirlərin təşkilinə cəlb olunacaqlar. Həmçinin tərəflər, birgə layihələrin, konfransların, seminarların, eyni zamanda ölkəmizin turizmin potensialının artırılması, sahibkarlığın inkişafı, o cümlədən qadın sahibkarların bilik və bacarıqların artırılması istiqamətində faəliyyətlərin icra olunması və kənd turizminin inkişafı istiqamətində fəaliyyət göstərəcəklər. ASAN Könüllüləri Təşkilatı ilə əməkdaşlığa dair memorandum Azərbaycan Turizm və Menecment Universitetinin rektoru İlham Mədətov və ASAN Könüllüləri Təşkilatının sədri Bəxtiyar İslamov tərəfindən imzalanıb. ..
13.11.2017 17:05
“Turizm və Qonaqpərvərlik tədqiqatları” beynəlxalq elmi jurnalının 2017-ci il üçün üçüncü sayı çapdan çıxıbAzərbaycan Turizm və Menecment Universitetinin “Turizm və Qonaqpərvərlik tədqiqatları” beynəlxalq elmi jurnalının 2017-ci il üçün üçüncü sayı çapdan çıxıb. Jurnalın bu sayına daxil edilən məqalələrdə Azərbaycanda çimərlik turizminin, ovçuluq və balıqçılıq turizminin tədqiqinə, ekoturizmin inkişafının öyrənilməsinə, eləcə də şirkətlərin korporativ idarəetmə sisteminin və aqrar sahibkarlığın inkişaf potensialının təhlilinə həsr olunan elmi araşdırma nəticələri yer alıb. Jurnaldakı məqalələrlə yaxından tanış olmaq istəyənlər ATMU-nun Kitabxana İnformasiya Mərkəzinə müraciət edə və ya  elektron versiyasını universitetin veb saytından əldə edə bilərlər. ..
13.11.2017 15:54
Şahdağda “Salsa & Baçata Festival”ı keçirilmişdir11 noyabr tarixində “Şahdağ” Turizm Mərkəzində çoxdan gözlənilən Latın Amerikası rəqsləri üzrə festival keçirilmişdir. Əvvəlcədən elan edildiyi kimi, festivalda Amerika Birləşmiş Ştatları və İspaniyadan dünya səviyyəli salsa ustaları İvana Adler və Shaka Brown cütlüyü ilə Alba Fernandez və David Moyano cütlüyü iştirak edərək, paytaxtımızın ən məşhur Latın Amerika rəqsi məktəblərinin nümayəndələrinə master-klass keçmişdirlər. “Badi Kuba”, “Baila Baku”, “Profi Dance”, “Let’s dance studio”, “Buta Salsa” və “Street Salsa” məktəblərinin iştirakı ilə tədbirdə 220-dən çox rəqqas iştirak etmişdir. Tədbirin birinci hissəsində İvana Adler və Shaka Brown cütlüyü “Salsa”, Alba Fernandez və David Moyano cütlüyü isə “Baçata” rəqslərinin incəlikləri barəsində təlim keçmiş, festivalın ikinci hissəsi isə əsl bayram əhval-ruhiyyəsi ilə davam etmişdir. Tədbir iştirakçılarına sürpriz olaraq Gürcüstan Milli Sosial Rəqs Federasiyasının prezidentinin iştirakı ilə “Kizomba” rəqsi üzrə də master-klass təşkil olunmuş və tədbir iştirakçılarının sevincinə səbəb olmuşdur. Azərbaycanda ilk dəfə təşkil olunan tədbirə nəinki paytaxtda, eləcə də region ölkələrində kifayət qədər çox maraq göstərildiyindən festivalın ənənə halını alaraq hər il və daha geniş miqyasda keçirilməsi planlaşdırılır. Mədəniyyət və Turizm Nazirliyinin tabeliyində olan “Şahdağ” Turizm Mərkəzi ölkəmizin yalnız xizəkçilik, hotelçilik və qış-yay əyləncələri turizmi ilə deyil, eləcə də bu cür əyləncəli tədbirlərin də inkişaf etdiyi festivallar, beynəlxalq tədbirlər turizmi ilə də tanınması üçün daim öz töhfəsini verir.   ..
13.11.2017 15:53
2017-ci ilin 10 ayı üzrə ölkəyə gələn xarici vətəndaşların sayında 20.1% artım müşahidə edilmişdirCari ilin 10 ayı ərzində ölkəmizə gələn xarici vətəndaşların sayı 2 276 604 nəfər olmuşdur. Onlardan 727 577 Rusiya Federasiyası, 439 305 Gürcüstan, 320 904 İran, 249 210 Türkiyə, 81 742 Birləşmiş Ərəb Əmirlikləri ,  54 242 İraq, 49 809 Ukrayna, 31 821 Səudiyyə Ərəbistanı, 321 994 nəfəri isə digər ölkələrin vətəndaşları olmuşdur. Xarici vətəndaşlar daha çox iyul ayında gəlmişdir ki, bu da 313 515 nəfər olmuşdur. Dövr ərzində ölkəmizə gələn xarici vətəndaşların ümumi sayında Rusiya, Gürcüstan, İran və Türkiyə vətəndaşlarının xüsusi çəkisi daha çox olmuş və müvafiq olaraq 31,9 faiz, 19.2 faiz, 14  faiz və 10.9 faiz təşkil etmişdir.    Ötən ilin müvafiq dövrü ilə müqayisədə bu il əsas artım tempi göstərən ölkələr İran, BƏƏ, Rusiya olmuşdur. Belə ki, bu il İrandan 115 782, BƏƏ-dən 42 811, Rusiyadan 96 040 nəfər daha çox şəxs gəlmişdir. 2016-cı ilin 10 ayında Azərbaycana gələn xarici vətəndaşların sayı 1 894 707 nəfər təşkil etmişdir. Ötən  ilin müvafiq dövrü ilə müqayisədə cari ildə Azərbaycana 381 807 (20.1%) nəfər çox xarici vətəndaş gəlmişdir. ..
08.11.2017 16:42
ATMU-nun iki əməkdaşı Türkiyədə keçirilən I Təhsil və Sosial Elmlər Simpoziumunun iştirakçısı olubAzərbaycan Turizm və Menecment Universitetinin “Dillər” kafedrasının müdiri f.e.n., dosent Kəmalə Kərimova və həmin kafedranın dosenti, f.e.n., Ağaverdi Xəlilov 03-05 noyabr 2017-ci il tarixlərində Türkiyə Cümhuriyyəti Bandırma On yeddi Eylül Universitetində təşkil olunan I Təhsil və Sosial Elmlər Simpoziumunda iştirak ediblər. Tədbirin gündəliyinə Türk dili və ədəbiyyatı, təhsil, tarix, arxeologiya, coğrafiya, hüquq, fəlsəfə, iqtisadiyyat, sosiologiya, biznesin idarə edilməsi, ekonometriya, siyasi elmlər, beynəlxalq münasibətlər, idman, turizm, kitabaxana işi və digər sahələr üzrə məruzələr daxil idi. ATMU-nun kafedra müdiri K.Kərimova deyib ki, simpoziumun keçirilməsində başlıca  məqsəd fənlərarası inteqrasiya çərçivəsində elm adamlarının görüşünün təşkilinə, eyni zamanda fikir mübadiləsi aparmalarına zəmin yaratmaq idi. Türkiyənin Bandırma On yeddi Eylül Universitetində 3 gün davam edən I Təhsil və Sosial Elmlər  Simpoziumuna təxminən 720 nəfər təhsil və elm adamı qatılıb. İştirakçılar dünyanın 20 ölkəsini -Türkiyə, Fransa, Bosniya və Herseqovina, Qazaxıstan, Azərbaycan, Küveyt, Qatar, Birləşmiş Ərəb Əmirlikləri, Bəhreyn, Oman, Səudiyyə Ərəbistanı, İraq, Misir, Mərakeş, Əlcəzair, Tunis, Yəmən, Sudan, Livan və Fələstin dövlətlərini təmsil edirdilər. Qeyd edək ki, ATMU-nun kafedra müdiri, dos. Kəmalə Kərimova “Turist firmasında gənc mütəxəssisin adaptasiyası“ və kafedranın dos. Ağaverdi Xəlilov  isə “Türk və şumer eposunun struktur bənzərliyi: ritual və janr əlaqələri kontekstində“ adlı elmi məruzələrinə görə  Sertifikat və Təşəkkürnamə alıblar. ..
08.11.2017 00:00
ATMU-da Azərbaycan Dövlət Bayrağı gününə həsr olunan tədbir keçirilibNoyabrın 8-də ATMU-da Azərbaycan Dövlət Bayrağı gününə həsr olunan tədbir keçirilib. Universitetin Tələbə Gənclər Təşkilatı “Vətənpərvərlik” klubunun təşəbbüsü ilə keçirilən “Bayrağımız qürur mənbəyimizdir” adlı tədbiri giriş sözü ilə açan ATMU-nun rektoru İlham Mədətov  Azərbaycan Respublikasının Dövlət Bayrağı haqqında ilk hökumət qərarının 1918-ci il iyunun 24-də Gəncə şəhərində verildiyini,1918-ci ilin noyabrında isə Bakıda Nazirlər Şurası tərəfindən Azərbaycan bayrağının göy, qırmızı və yaşıl rənglərdən, mərkəzdə ağ aypara və səkkizguşəli ulduzdan ibarət olması barədə növbəti  qərarın qəbul edildiyini diqqətə çatdırıb. Rektor təbrik nitqində xüsusi olaraq vurğulayıb ki, “Minbir müşkülatla qaldırılan” O şanlı   bayraq bir də 1990-cı il noyabrın 17-də Naxçıvan Muxtar Respublikası Ali Məclisinin sədri, ulu öndər Heydər Əliyevin təşəbbüsü və rəhbərliyi ilə keçirilən sessiyada Muxtar Respublikanın dövlət bayrağı kimi qəbul edilib. Eyni zamanda, Naxçıvan Muxtar Respublikası Ali Məclisi Azərbaycan SSR Ali Soveti qarşısında üçrəngli bayrağımızın Azərbaycanın rəsmi dövlət rəmzi kimi tanınması haqqında vəsatət qaldırıb. “Bayrağımız qürur mənbəyimizdir” adlı tədbirin iştirakçılarından İctimai fənlər kafedrasının müəllimi Bünyamin Qənbərov , müvafiq struktur rəhbərləri- Anar Mirzəyev, Anar Fərmayılov, TGT ”Vətənpərvərlik” klubunun üzvləri  qeyd ediblər ki, ümummilli liderin bizə ərməğan qoyduğu müasir müstəqil Azərbaycanda onun siyasi xəttini uğurla davam etdirən Prezident İlham Əliyevin milli ideallara bağlılığı, həm də üçrəngli bayrağımıza münasibətdə açıq-aydın görünür. Prezident İlham Əliyevin 2009-cu il noyabrın 17-də imzaladığı Sərəncamla Azərbaycanın üçrəngli bayrağının ilk dəfə rəsmi ucaldığı 9 noyabr 1918-ci il tarixi Azərbaycan Respublikasının Dövlət Bayrağı Günü kimi təsis edilib. 2010-cu ildən etibarən noyabrın 9-u hər il respublikamızda Dövlət Bayrağı Günü kimi qeyd olunur. Azərbaycanın  ərazi bütövlüyünü bərpa etmək, milli dövlət bayrağımızı işğal altında qalan vətən torpaqlarında dalğalandırmaq məhz bugünkü gəncliyin şərəf borcudur. Azərbaycanın Dövlət Bayrağı gününə həsr olunan tədbir ATMU TGT “Vətənpərvərlik” klubu üzvlərinin hazırladıqları xüsusi videoçarxın nümayişi ilə başa çatıb. ..