Cəbrayıl və Füzuli rayonlarının işğalının 26-cı ildönümü ilə əlaqədar anım tədbirləri keçirilmişdir
23 avqust 2019-cu il tarixdə Cəbrayıl və Füzuli rayonlarının işğalının 26-cı ildönümü ilə əlaqədar Biləsuvar Regional Mədəniyyət İdarəsinin tabeliyində fəaliyyət göstərən mədəniyyət müəssisələrində anım tədbirləri keçirilmişdir.
Maarifləndirici və vətənpərvərlik ruhlu tədbirlərdə hər iki rayonumuzun tarixi, maddi-mənəvi irsi, Qarabağ uğrunda gedən döyüşlər, hazırda işğal altında qalan mədəniyyət obyektləri və s. mövzular ətrafında müzakirələr aparılmış, iştirakçılara ətraflı informasiya verilmişdir.
Cəbrayıl Tarix-Diyarşünaslıq Muzeyində Cəbrayıl uğrunda döyüşlərdə şəhid olmuş Nurəddin Fətullayevin xatirəsi anılıb. Şəhidin ailə üzvləri və döyüş yoldaşları, mədəniyyət işçiləri, rayonun tanınmış ziyalıları və məktəblilərin iştirak etdiyi tədbirin ədəbi-bədii hissəsində məktəblilər qəhrəmanlıq şeirləri səsləndirib və qonaqlara kiçik tamaşa təqdim ediblər.
Salyan, Cəbrayıl və Biləsuvarın mərkəzi kitabxanalarında kitab sərgiləri və dəyirmi masalar təşkil edilmişdir. Mövzunu əks etdirən ədəbiyyatın təqdimatı və müzakirəsi iştirakçılar tərəfindən maraqla qarşılanmışdır.
Biləsuvar və Cəbrayılın mədəniyyət işçiləri rayon ərazisindəki şəhidlərin qəbirlərini ziyarət etmişlər.
Heydər Əliyev mərkəzlərində Qarabağın tarixi və mədəniyyətinə həsr olunmuş sənədli filmlər nümayiş edilmişdir. Neftçala və Biləsuvarın rəsm qalereyalarında açıq havada gənc rəssamların əl işləri təqdim olunmuşdur.
Biləsuvar Regional Mədəniyyət İdarəsi tərəfindən gələn həftə Qubadlı rayonunun işğalının ildönümü ilə bağlı analoji tədbirlərin keçirilməsi planlaşdırılır.