Hər il may ayının 18-i dünya ölkələrində Beynəlxalq Muzeylər Günü kimi geniş qeyd edilir. Beynəlxalq Muzeylər Şurasının (ICOM) təşəbbüsü ilə 1977-ci ildə təsis olunmuş bu əlamətdar günün məqsədi muzeylərin cəmiyyətdə nə dərəcədə mühüm rol oynadığını göstərməkdir. Dünyanın 150-dək ölkəsində keçirilən Beynəlxalq Muzeylər Günü bu il “Hiperkommunikasiya dövründə muzeylər: yeni yanaşmalar, yeni auditoriyalar” mövzusuna həsr olunub. Bu gün muzeylərimiz öz fəaliyyətini yalnız tarixi eksponatların nümayişi ilə məhdudlaşdırmır. Bu məkanlarda tez- tez görüşlər, xatirə gecələri, musiqi saatları və sərgilər təşkil olunur, eyni zamanda muzeyə gələn ziyarətçilərə müxtəlif proqramlar təklif edilir. Bir sözlə müasir muzeylər daha aktiv kommunikasiya məkanına çevrilməkdədir.
C. Cabbarlı adına Azərbaycan Dövlət Teatr Muzeyi də bu peşə bayramında öz qonaqlarının qarşısına konsert proqramı və sərgi ilə çıxacaq. Sərgidə ümummilli lider Heydər Əliyevin mədəniyyətə olan diqqət və qayğısını əks etdirən kadrlar yer alacaq, həmçinin bu böyük dövlət xadiminin siyasi fəaliyyətindən bəhs edən video çarx nümayiş etdiriləcək.
Konsert proqramı isə Azərbaycan Milli Konservatoriyasının tərkibindəki Musiqi Kollecinin tələbələrinin iştirakı ilə baş tutacaq.
18 may 2018-ci il tarixində keçiriləcək bu tədbir axşam saatlarında 18:00-dan 20:00 -a qədər davam edəcək.
Həmin gün “Açıq qapı” günü elan olunacaqdır.