Şadiya Toquan: "Azərbaycanın tarixi və mədəniyyət abidələrinin qorunub saxlanılmasına verdiyi töhfələr dünyada yüksək dəyərləndirilir"
UNESKO-nun fəaliyyətində ən önəmli tədbirlərdən biri olan Ümumdünya İrs Komitəsinin sessiyası hər il müxtəlif məkanlarda keçirilir. Azərbaycanın UNESKO-nun belə bir mötəbər tədbirinə ev sahibliyi etməsi onun həm zəngin tarixə və mədəniyyətə sahib olmasını, həm də bu irsin qorunub saxlanılmasına verdiyi töhfələrin dünyada yüksək dəyərləndirildiyini nümayiş etdirir. Düşünürəm ki, Bakı sessiyasında geniş müzakirələr aparılacaq, dünyaya faydalı mesajlar veriləcək. Sessiyanın proqramı çox zəngin olsa da, çalışacağam ki, şəhərinizi mümkün qədər çox gəzim.
Bu sözləri UNESKO-nun Ümumdünya İrs Komitəsinin 43-cü sessiyasının iştirakçısı, Komitənin Ərəb ölkələri üzrə regional mərkəzinin direktoru Şadiya Toquan deyib.
“Belə beynəlxalq səviyyəli tədbirlərin keçirilməsi üçün ölkənizin Bakı Konqres Mərkəzi kimi möhtəşəm məkanı vardır. Bakı belə tədbirlərə ev sahibliyi etməkdə böyük təcrübəyə malikdir. Azərbaycan dövlətini bu tədbiri yüksək səviyyədə təşkil etdiyinə görə təbrik edirəm.
Sessiya çərçivəsində təşkil olunan müzakirələr zamanı komitə üzvlərinin UNESKO-nun “Ümumdünya mədəni və təbii irsin qorunması haqqında” Konvensiyasının (Paris, 1972-ci il 16 noyabr) icrasının təkmilləşdirilməsinə verdiyi tövsiyələr çox dəyərlidir. Eyni zamanda, bu tədbirdə UNESKO-nun iştirakçı dövlətləri tarixi və mədəni abidələrin qorunub saxlanılması üzrə müzakirələr aparacaqlar”, – deyə Şadiya Toquan vurğulayıb.