Elmi və mədəni tərəqqinin müstəqil Azərbaycanın gələcəyi üçün müstəsna əhəmiyyətini nəzərə alaraq istedadlı gənclərə Azərbaycan Respublikası Prezidentinin himayəsini, onların yaradıcılıq potensialını inkişaf etdirmək üçün dövlət qayğısını təmin etmək məqsədilə ümummilli lider Heydər Əliyev “Azərbaycanda gənc istedadlara dövlət qayğısı haqqında” 1996-cı il 22 iyun tarixli 464 nömrəli Fərman imzalamışdır. Bu Fərmana uyğun olaraq Azərbaycan Respublikası Prezidentinin müvafiq sərəncamları ilə musiqi sahəsində xüsusi istedadı olan gənclərin adları Azərbaycanın gənc istedadlarının “Qızıl kitabı”na yazılmış və onlar Azərbaycan Respublikası Prezidentinin xüsusi aylıq təqaüdünə layiq görülmüşlər.
Prezident təqaüdçüləri olan gənc istedadlı musiqiçilərin respublikada tanınması və gənc nəsildə bədii-estetik zövqün inkişaf etdirilməsi məqsədilə Azərbaycan Respublikasının Mədəniyyət Nazirliyi mütəmadi olaraq bölgələrdə onların konsertlərini təşkil edir.
Növbəti belə tədbirlərdən biri 7 dekabr 2018-ci il tarixində Şamaxı şəhərində baş tutmuşdur. Şamaxı şəhər İncəsənət Təhsili Mərkəzində keçirilən konsertdə istedadlı gənc musiqiçilərin ifasında Azərbaycan və dünya bəstəkarlarının əsərlərindən, xalq mahnı və muğamlarımızdan ibarət musiqi nömrələri səslənmişdir.
Konsertdə Şamaxı rayon İcra hakimiyyətinin, İsmayıllı Regional Mədəniyyət İdarəsinin nümayəndələri, mədəniyyət, təhsil müəssisələrinin işçiləri, yeniyetmə və gənclər iştirak etmişlər.
