“Avey” Dövlət Tarix-Mədəniyyət qoruğu ərazisində beynəlxalq ekspedisiya tərəfindən arxeoloji qazıntılar aparılmışdır
2015-ci ilin yayında Mədəniyyət və Turizm Nazirliyinin təşəbbüsü ilə “Avey” Dövlət tarix-mədəniyyət qoruğunun dünya əhəmiyyətli abidələr siyahısına daxil olan Damcılı mağarası və mağara düşərgəsinin ətrafında Yaponiyanın Tokio Universitetinin professoru Yoşihiro Nişiakinin rəhbərliyi altında aparılan kəşfiyyat xarakterli axtarışlar zamanı əldə olan nəticələr 2016-cı ildə Mədəniyyət və Turizm Nazirliyi tərəfindən “Avey” Dövlət tarix-mədəniyyət qoruğu, AMEA-nın Arxeologiya və Etnoqrafiya İnsitutu və Yaponiyanın Tokio Universiteti arasında üçtərəfli memorandum imzalanmasına əsas vermişdir.
Beynəlxalq ekspedisiyanın məqsədi ərazinin qədim insan məskəni olduğunu təsdiqləmək, bundan başqa neolitdən əvvəlki dövrlərə aid maddi sübutlar əldə etməkdir.
2016-cı ilin avqust ayında aparılan tədqiqatlar zamanı orta paleolit dövrünün son mərhələsini əks etdirən qəlpə, nüvə tullantıları və alət nümunələri, neolit, tunc dövrünün sonuna aid ocaq yerləri, fauna nümunələri (sümüklər), orta əsrlər aid tikili qalıqları əldə olunmuşdur.
17-30 iyul 2017-ci il tarixində beynəlxalq ekspedisiya növbəti dəfə tədqiqat işləri aparmışdır. Bu il aparılan qazıntılar nəticəsində bu ərazilərdə neolit dövrünün mövcudluğu öz təsdiqini tapmışdır.
Aparılan işlər nəticəsində əldə olunan eksponatlar 28 iyul - Ümumdünya arxeologiya günü münasibətilə “Avey” Dövlət tarix-mədəniyyət qoruğunda təşkil olunan sərgidə 3 gün müddətində ziyarətçilərə nümayiş etdirilmişdir.