“Azərbaycan Respublikasının Dövlət bayrağı – 100 illik istiqlalımızın qürur mənbəyi” mövzusunda elmi-praktik konfrans keçirildi
7 noyabr 2018-ci il tarixində Dövlət Bayrağı Günü münasibətilə Bakı Biznes Mərkəzində “Azərbaycan Respublikasının Dövlət bayrağı – 100 illik istiqlalımızın qürur mənbəyi” mövzusunda elmi-praktik konfrans keçirildi. Dənizkənarı Bulvar İdarəsinin Prezident yanında Dövlət İdarəçilik Akademiyası ilə birgə təşkil etdiyi tədbirdə Azərbaycan bayrağının mənəvi, siyasi və ideoloji əhəmiyyəti barədə fikir mübadiləsi aparıldı. Bulvar İdarəsinin Aparat rəhbəri, siyasi elmlər üzrə fəlsəfə doktoru Elmir Bağırov, AMEA-nın müxbir üzvü, Azərbaycan Milli Elmlər Akademiyasının Qafqazşünaslıq İnstitutunun direktoru, professor Musa Qasımlı, Azərbaycan Respublikası Prezidenti yanında Dövlət İdarəçilik Akademiyasının tarix kafedrasının müdiri, dosent Firdovsiyyə Əhmədova, Azərbaycan Respublikasının Prezidenti yanında Dövlət İdarəçilik Akademiyasının professoru, Siyasi elmlər doktoru Elçin Əhmədov və digər qonaqlar məruzlərlə çıxış etdilər.
Tədbir Qara Qarayev adına Mərkəzi İncəsənət Məktəbinin şagird və müəllimlərinin iştirakı ilə keçirilən konsertlə başa çatdı. Çıxışlar konfrans iştirakçıları tərəfindən alqışlarla qarşılandı. Konfransın təşkilat komitəsi tərəfindən məktəb rəhbərliyinə minnətdarlıq edildi.