Azərbaycan və Özbəkistanın dövlət müstəqilliyinin 27-ci ildönümünə həsr olunmuş möhtəşəm konsert keçirilib
Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə Daşkənd İrriqasiya və Meliorasiya İnstitutunda keçirilən tədbirdə İnstitutun müəllim və tələbə heyəti, Azərbaycan Mədəniyyət Mərkəzinin əməkdaşları, elm, mədəniyyət xadimləri, çoxsaylı jurnalistlər iştirak ediblər.
Tədbiri giriş sözü ilə İnstitutun prorektoru Qadırjon Şavazov açaraq xalqlarımız üçün böyük nemət olan müstəqilliyin əldə edilməsi, ötən illərdə əldə edilən uğurlar, Özbəkistan və Azərbaycan xalqları arasında dostluq əlaqələrindən danışaraq, Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə azərbaycanlı sənətçilərin İnstitutda keçirilən konsert proqramını yüksək qiymətləndirdi. O, ruhu, dili, mədəniyyəti, adət-ənənələri eyni olan xalqlarımızın müstəqilliyinin və dostluğunun əbədi olmasını arzuladı.
Mərkəzin direktoru Samir Abbasov Azərbaycan xalqının dövlətçilik tarixinin olduqca dərin köklərə malik olduğunu, XX əsrin əvvəllərində 23 ay mövcud olan Azərbaycan Xalq Cümhuriyyətinin süqutundan sonra əsrin sonlarında yenidən Azərbaycanın öz müstəqilliyinə qovuşduğunu qeyd etdi. O, müstəqilliyin əldə edilməsi qədər, onun qorunub saxlanılmasının da çətin və şərəfli vəzifə olduğunu və bu istiqamətdə Ulu öndər Heydər Əliyevin müstəsna xidmətlərini qeyd edib.
Diplomat bu il Azərbaycan və Özbəkistanın dövlət müstəqilliyinin 27-ci ildönümünü qeyd etdiyini söyləyərək, habelə Azərbaycan Respublikasının Prezidenti İlham Əliyevin Sərəncamı ilə Azərbaycan Xalq Cümhuriyyətinin yüz illiyi ilə əlaqədar 2018-ci ilin “Cümhuriyyət ili” elan edildiyini qeyd edib. Azərbaycan – Özbəkistan dostluğundan danışaraq xalqlarımızın yaxınlığını, habelə eyni taleyi bölüşdüyünü vurğulayıb.
Daha sonra azərbaycanlı sənət ustalarının iştirakı ilə Azərbaycan Mədəniyyət Mərkəzi tərəfindən təşkil olunan konsert proqramı təqdim edilib.
Azərbaycan Respublikasının Xalq artisti Gülyanaq Məmmədova, Əməkdar artistlər, tarzən Sahib Paşazadə, xanəndə Nigar Şabanova və Bakıda keçirilən beynəlxalq muğam müsabiqəsinin qalibi Abgül Mirzəliyevin çıxışları tamaşaçılar tərəfindən maraq və alqışlarla qarşılanıb. Azərbaycan müğənniləri bir sıra Özbək xalq mahnılarını da ifa ediblər.
Konsertdə Mərkəzin nəzdindəki “Azərbaycan qızları” rəqs ansamblı da çıxış edib.
İnstitutun müəllim heyəti tədbiri yüksək qiymətləndirərək Azərbaycan sənətçilərinin ifalarını ilk dəfə olaraq dinlədiklərini və proqramın onlarda böyük təəssürat yaratdığını söyləyiblər.