Son illər ölkəmizdə turizmin inkişafı ilə bağlı atılan addımlar respublikamıza turist axınının sürətlənməsinə, regionlarda yeni turizm infrastrukturlarının yaranmasına və turistlərə göstərilən xidmətlərin sayının artmasına səbəb olmuşdur.
Yerli və xarici turistlərə ölkəmizin mövcud turizm imkanları və tarixi ilə bağlı zəruri və düzgün məlumatların verilməsi, turist məmnuniyyətinin təmin edilməsi və turistlərlə kommunikasiyanın düzgün qurulmasında turizm bələdçilərin fəaliyyəti önəmli rol oynayır.
Bununla bağlı, aprel ayının 9-da “Hilton” mehmanxanasında Mədəniyyət və Turizm Nazirliyi tərəfindən Azərbaycan Turizm və Menecment Universitetinin nəzdində “Turizm bələdçilərinin və tərçüməçi-gidlərin Attestasiya Komitəsi”ndən bələdçi kartı almış bələdçilərin iştirakı ilə toplantı keçirilmişdir.
Toplantının açılışını Mədəniyyət və Turizm Nazirliyinin Turizm şöbəsinin müdiri Aydin İsmiyev açaraq, ölkəmizdə turizmin mövcud vəziyyəti, inkişaf dinamikası, turizm sahəsi ilə bağlı yaradılmış Assosiasiya və İctimai Birliklər (Azərbaycan Turizm Assosiasiyası, Azərbaycan Sağlamlıq və Termal Turizmə Dəstək İctimai Birliyi, Kənd Yaşıl Turizminin İnkişafına Dəstək İctimai Birliyi) haqqında məlumatlar vermiş, turizm bazarının genişlənməsi, ölkəmizdə fəaliyyət göstərən turizm bələdçilərinin sayının artması və bu sahədə görüləcək işlərin daha sürətləndirilməsi məqsədilə Bələdçilər Assosiasiyasının yaradılması zərurətini qeyd etmişdir.
Bu təkliflə bağlı bir neçə bələdçi çıxış edərək assosiasiyanın yaradılması məsələsi dəstəklənmiş və tədbirdə iştirak edən 125 bələdçi tərəfindən səsvermə yolu ilə qəbul edilmişdir.
Toplantının davamı olaraq Bələdçilər Assosiasiyasının təsis konfransı keçirilmiş, Təşəbbüs Qrupunun sədri seçilmiş Əlixan Mürvətov iclası apararaq, bələdçilər tərəfindən səsvermə yolu ilə assosiasiyanın 9 nəfərdən ibarət İdarə Heyətinin üzvləri müəyyən edilmişdir.
Tədbirdə iştirak edən Azərbaycan Turizm Assosiasiyasının sədri Nahid Bağırov çıxış edərək yeni yaradılan Bələdçilər Assosiasiyasına ilkin mərhələdə təşkilatı işlərin həyata keçirilməsində və gələcək fəaliyyətində dəstək göstərəcəyini bildirmişdir.
İclasın sonunda yeni yaradılmış Assosiasiyanın dövlət qeydiyyatına alınması ilə bağlı İdarə Heyətinin üzvləri tərəfindən müvafiq müraciətin edilməsi qərara alınmışdır.
Ölkəmizdə Bələdçilər Assosiasiyasının yaradılması ölkə ictimaiyyətində və beynəlxalq arenada Azərbaycanın maraqlarının təmin edilməsi, Dünya Turizm Bələdçilərinin Assosasiyalar Federasiyasına (WFTGA) üzv olunması, beynəlxalq standartlara cavab verən bələdçi və təlimçilərin hazırlanması, vahid ekskursiya mətnlərinin tərtibi, turizm bələdçilərinin elektron kataloqunun hazırlanması və turizm sənayesinin digər fəaliyyət sahələrinə öz müsbət töhfəsini verəcəkdir.