Azərbaycanın sədrliyi ilə yaradılmış işçi qrupunun hazırladığı Turizm Etikası üzrə Konvensiya Birləşmiş Millətlər Ümumdünya Turizm Təşkilatının Baş Assambleyasında təsdiq edilmişdir
Xəbər verdiyimiz kimi, Azərbaycan nümayəndə heyətinin də iştirak etdiyi Birl
əşmiş Millətlərin Ümumdünya Turizm Təşkilatının (BMÜTT) Baş Assambleyasının 22-ci sessiyası cari ilin 11-17 sentyabr tarixində Çin Xalq Respublikasının Çenqdu şəhərində keçirilir.Tədbirin 15 sentyabr tarixində keçirilən növbəti sessiyası çərçivəsində BMÜTT-nin Turizm Etikası üzrə Konvensiyasının yekun variantının təsdiq edilməsi məsələsi müzakirəyə çıxarılmışdır.
Qeyd edirik ki, Turizm Etikası üzrə Konvensiyanın hazırlanması məqsədilə yaradılmış işçi qrupuna, eləcə də sözügedən Konvensiyanın razılaşdırılması və BMÜTT-nin Baş Assambleyasının 22-ci sessiyasına təsdiq edilməsi üçün yaradılmış Xüsusi Komitəyə (Ad Hoc) Azərbaycan Respublikasının mədəniyyət və turizm nazirinin müavini Nazim Səmədov sədrlik etmişdir.
Bununla bağlı, sessiya çərçivəsində işçi qrupunun sədri qismində çıxış edən N. Səmədov Turizm Etikası üzrə Konvensiyanın turistlərin hüquqlarının qorunması, onların təhlükəsizliyi naminə aparılmalı olan islahatlar, turizm sənayesi mütəxəssislərinin üzərinə düşən öhdəliklər, eləcə də turizmin davamlı inkişafda və beynəlxalq sülhdə oynadığı rol və turizm sektoru üzrə bir sıra digər mühüm müddəaları özündə əks etdirdiyini xatırlatmış və üzv ölkələri bu mühüm sənədin təsdiq edilməsinə dəstək verməyə çağırmışdır.
BMÜTT-nin Baş Katibi Taleb Rifai Azərbaycan nümayəndəsinin bu çıxışını dəstəkləmiş və sözügedən Konvensiyanın hazırlanmasında Azərbaycanın böyük payının olduğunu vurğulamışdır. Səsvermə zamanı Azərbaycan daxil olmaqla, 51 ölkə sənədin mətninin qəbul olunmasını dəstəkləmişdir. Tədbirdə iştirak edən Azərbaycan nümayəndə heyəti də çıxış edərək ölkələrin beynəlxalq hüquqi prinsiplərə hörmət etməsinin vacibliyini vurğulamış və bu baxımdan Konvensiyanın təsdiqinin zəruri olduğunu qeyd etmişdir.
Bununla da, üzv ölkələrin yekdilli razılığı ilə Turizm Etikası üzrə Konvensiya BMÜTT-nin Baş Assambleyasının 22-ci sessiyasında təsdiq edilmişdir.
Məlumat üçün qeyd edirik ki, 1999-cu ildə təsdiq edilmiş “Turizmin qlobal etik kodeksi”nə əsaslanaraq hazırlanmış Turizm Etikası üzrə Konvensiya BMÜTT-nin ilk Konvensiya sənədi olacaqdır.
Bununla da, Azərbaycan turizm sahəsinde təsdiq edilən ilk Konvensiya oz töhvəsini vermişdir.