Azərbaycanlı tələbələr ölkəmizi Bolqarıstanda keçirilən beynəlxalq festivalda təmsil edib
1-5 iyul 2019-cu il tarixində Bolqarıstan Respublikasının Plovdiv şəhərində keçirilən “Birlikdə yaradıcıllıq” festivalında ölkəmizi Azərbaycan Dillər Universitetinin tələbələri Lalə Rüstəmli və Bəyaz Hüseyn uğurla təmsil edib.
Frankofon Universitetlər Agentliyi tərəfindən təşkil olunmuş festival Orta və Şərqi Avropada fransız dillində təhsil alan tələbələr arasında keçirilib. Festivalın səlahiyyətli şəxsləri Frankofon Universitetlər Agentliyinin Orta və Şərqi Avropa üzrə regional direktoru Mohammed Ketata, layihənin menecerləri Peter Topareff, Ana Maria Bodgros və Olesea Simiondur.
Məlumat üçün qeyd edək ki, festivalda 17 ölkədən 79 təmsilçi (o cümlədən Azərbaycandan iki nəfər) iştirak etmişdir. Təmsilçilər Azərbaycan Dillər Universitetinin “Frankofoniya, fransız dili və mədəniyyəti mərkəzi”ndən namizədliyimizi irəli sürüb, müsahibə vasitəsilə seçilib.
Qeyd edək ki, Azərbaycanın təqdimatı iyulun 4-də baş tutub. Təqdimat zamanı Azərbaycanlı tələbələr tərəfindən hazırlanmış ölkəmizin ərazisi, regionları, iqtisadiyyatı, mədəniyyəti, mətbəxi, qeyri-maddi mədəni irsi haqqında təqdimatı nümayiş olunub. Həmçinin tədbirdə milli süfrə hazırlanıb. Digər tədbir iştirakçılarına suvenirlər və kitablar hədiyyə olunub. Tədbirdə “Nəlbəki” və UNESKO-nun Təcili Qorunma Siyahısına daxil edilmiş “Yallı” milli rəqsləri ifa olunub.