Oktyabrın 14-də Bakıdakı “Elektra Events Hall”-da növbəti Beynəlxalq Caz Festivalının açılış mərasimi keçirildi. Festival Mədəniyyət Nazirliyi, “Jazz dünyası” jurnalı, “A+A Events” şirkəti və “The Landmark Hotel Baku”nun təşkilatçılığı ilə gerçəkləşir.
Açılış mərasimində festivalın əhəmiyyətindən söz açıldı, ölkəmizdə il ərzində müxtəlif musiqi festivallarının keçirildiyi vurğulandı. Caz sənətinin tarixindən bəhs olunaraq müasir Azərbaycan musiqi mədəniyyətinin mühüm istiqamətinə çevrilən cazın Bakıda ötən əsrin 20-30-cu illərindən yayılmağa başlandığı bildirildi. Qeyd olundu ki, görkəmli sənətkarlar Tofiq Quliyev və Niyazi 1940-cı ildə ilk caz orkestrini yaradırlar. Bu kollektiv qısa zaman ərzində peşəkarlığı və gözəl ifası ilə populyarlıq qazanır. Respublikamızda caz sənətinin ən yüksək inkişaf dövrü isə 1950-1960-cı illərə təsadüf edir. Bu dövrdə gənc klarnet ifaçısı Tofiq Əhmədov caz əsərlərini ifa edərkən milli musiqi ladlarından istifadə edir, onların üzərində işləyərək orkestr üçün kompozisiyalar yaradırdı. Bununla yanaşı, Qara Qarayev, Niyazi, Tofiq Quliyev və Rauf Hacıyevin dəstəyi ilə Azərbaycanda estrada və caz musiqisinin ikinci həyatı yaşanır. “Qaya” kvarteti, Rafiq Babayevin kollektivi və nəhayət, Vaqif Mustafazadə dövrü başlanır. Vaqif Mustafazadə Şərq muğamını Qərb dinləyicisi üçün anlaşılan dildə, yəni caz ruhunda, yurdunun dinləyiciləri üçün isə cazı doğma, onlara yaxın olan muğam dilində çatdıraraq sevdirdi. 70-ci illərin sonu - 80-ci illərin əvvəlində “Qızıl payız” festivalları, Vaqif Mustafazadənin xatirəsinə həsr olunmuş “Bakı 83” festivalı keçirildi. Bu dövrdə Bakı artıq caz mərkəzlərindən biri kimi məşhurlaşmışdı.
Hazırda ölkəmizdə caz musiqisinin öz dinləyici auditoriyası və pərəstişkarları var. Azərbaycanda yüksək istedadı və ifa səviyyəsi ilə milli caz sənətində rolu olan musiqiçilər yetişib. Həmin ifaçılar beynəlxalq caz festivallarında Azərbaycanı layiqincə təmsil edirlər. 2002-ci ildən başlayaraq Bakıda hər il müxtəlif təşkilatlar tərəfindən festivallar keçirilir və dünya caz musiqisinin təmsilçiləri azərbaycanlı ifaçılarla bir səhnəni bölüşürdülər. 2009-cu ildən isə Bakı Beynəlxalq Caz Festivalı Mədəniyyət Nazirliyi tərəfindən keçirilməyə başlanılıb. Bu illər ərzində festivalda dünya cazının məşhur simaları iştirak ediblər.
Daha sonra konsert proqramı başladı. Tanınmış Britaniya soul-ifaçısı və bəstəkar Omar Lye-Fuk çıxış etdi. İfaçını caz janrının Britaniya neo-soul istiqamətinin “atası” adlandırırlar. Müxtəlif müsabiqə və festivalların iştirakçısı olan musiqiçinin ifası tamaşaçılar tərəfindən alqışlarla qarşılandı.
Qeyd edək ki, oktyabrın 28-dək davam edəcək festival çərçivəsində oktyabrın 15-də Beynəlxalq Muğam Mərkəzində hazırda xaricdə yaşayan məşhur bakılılar – populyar pianoçu Leonid Ptaşka və virtuoz gitaraçı Həsən Bağırov çıxış edəcək. “Rotunda Jazz Club” (Landmark) səhnəsində 14 ölkədən gəlmiş qruplar cazın müxtəlif janrlarında öz ustalıqlarını nümayiş etdirəcəklər. Əfqan Rəsul, Elvin Bəşirov, Nurlan Abdullazadə (Azərbaycan), Laura Poldvere (Estoniya), Jan-Kristof Şoletin triosu (Fransa), “Music, music, music” qrupu (İsveç), Uv Steinmetz (Almaniya), Can Cankaya və Kağan Yıldız (Türkiyə), Martin Saleminin triosu (Belçika), Xelqe Leinin triosu (Norveç), “Kodaly Spicy Jazz” qrupu (Macarıstan), Mişel Pippokuino (Braziliya), Ruben Xainin triosu (Hollandiya), Qreqori Maret – Kristi Daşel qrupu (ABŞ), habelə Norveç caz orkestri açıq məkanda çıxış edəcəklər. Axşam konsertlərindən sonra adlı-sanlı cazmenlərin və gənc ifaçıların iştirakı ilə cem-seyşnlər təşkil olunacaq.
Festival çərçivəsində gənc caz ifaçılarının ənənəvi beynəlxalq müsabiqəsi keçiriləcək, rəssam Cəmalə Rəhmanlının “Azərbaycan caz qüllələri” sərgisi, kino tənqidçisi Ülvi Mehdinin “Caz janrının klassikası”nın təqdimatı olacaq və kinoprokat yenilikləri barədə məlumat veriləcək.