Beynəlxalq Musiqi Təhsili Cəmiyyətinin Bakıda 33-cü Ümumdünya Konfransı keçiriləcəkdir
Azərbaycan mədəniyyətinin ayrılmaz qolu olan musiqi sənəti çoxəsrlik inkişaf tarixinə malikdir. Musiqi yaradıcılığı nəsildən-nəslə ötürülərək inkişaf etmiş, təkmilləşmiş və zənginləşmişdir.
Klassik Azərbaycan musiqi sənətinin inkişafında müstəsna xidmətləri olan Üzeyir Hacıbəyli, Qara Qarayev, Fikrət Əmirov kimi dahi şəxsiyyətlər uzun illər sahənin inkişafı üçün dəyərli töhfələrini vermişlər.
Ölkə rəhbərliyinin mədəniyyətə olan yüksək diqqət və qayğısı nəticəsində Azərbaycan muğamı (2008), Azərbaycan aşıq sənəti (2009), Tar və onun ifaçılıq sənəti (2012) YUNESKO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilmişdir.
Azərbaycan musiqi sənətinin dünya musiqi arenasına inteqrasiyasının təmin edilməsi məqsədilə bir çox beynəlxalq mədəni tədbirlərə ev sahibliyi edən ölkəmizdə hər il Üzeyir Hacıbəyli Beynəlxalq Musiqi Festivalı, Bakı Beynəlxalq Caz Festivalı, Qəbələ Beynəlxalq Musiqi Festivalı və digər əhəmiyyətli tədbirlər keçirilir. Göstərilənlərdən əlavə Bakıda təşkil edilmiş “Eurovision 2012” mahnı müsabiqəsi beynəlxalq musiqi auditoriyasının ölkəmizə marağının daha da artmasına səbəb olmuşdur.
Son illər ərzində təşkil olunan mötəbər tədbirlər dünya musiqi ictimaiyyətinin diqqətindən kənarda qalmamış və növbəti beynəlxalq tədbirin - Beynəlxalq Musiqi Təhsili Cəmiyyəti (İnternational Society for Music Education – ISME) tərəfindən təşkilatın 33-cü Ümumdünya Konfransının 15-20 iyul 2018-ci il tarixində Bakı şəhərində keçirilməsi qərara alınmışdır.
Musiqi təhsili üzrə dünyanın müxtəlif ölkələrindən 500-dən çox mütəxəssisin iştirak edəcəyi konfrans Bakı şəhərinin Heydər Əliyev Sarayında, “Hilton Baku” mehmanxanasında, Üzeyir Hacıbəyli adına Bakı Musiqi Akademiyasında və Azərbaycan Milli Konservatoriyasında təşkil ediləcəkdir.
33-cü Ümumdünya Konfransının əsas tədbirləri aşağıdakılardır:
- Ümumdünya Konfransının açılış mərasimi - 16 iyul 2018-ci il, saat 18.00, Heydər Əliyev Sarayı;
- Beynəlxalq Türk Mədəniyyəti Təşkilatının (TÜRKSOY) Baş katibi Düsen Kaseinovun çıxışı - 17 iyul 2018-ci il, (saat 12.00), Üzeyir Hacıbəyli adına Bakı Musiqi Akademiyası (Opera zalı);
- Konfrans çərçivəsində “Turkic Session” adlı xüsusi tədbir - 17 iyul 2018-ci il, (saat 13.30), Azərbaycan Milli Konservatoriyası (Konsert zalı);
- Ümumdünya Konfransının bağlanış mərasimi - 20 iyul 2018-ci il, (saat 16.00), Üzeyir Hacıbəyli adına Bakı Musiqi Akademiyası (Opera zalı).