Beynəlxalq Türk Mədəniyyəti və İrsi Fondunun himayəsində yaradılan “Dədə Qorqud” kamera orkestrinin təqdimat mərasimi keçiriləcək
20 sentyabr 2018-ci il tarixində Beynəlxalq Muğam Mərkəzində Beynəlxalq Türk Mədəniyyəti və İrsi Fondunun himayəsində
yaradılmış “Dədə Qorqud” kamera orkestrinin təqdimat mərasimi keçiriləcəkdir. Tədbir 18-26 sentyabr 2018-ci il tarixlərində Azərbaycanın paytaxtı Bakıda “Üzeyir Hacıbəyli X Beynəlxalq Musiqi Festivalı” çərçivəsində təşkil olunur.Beynəlxalq Türk Mədəniyyəti və İrsi Fondu Azərbaycan, Qazaxıstan, Qırğız və Türkiyə Respublikalarının dövlət başçılarının dəstəyi ilə təsis edilmişdir. Fond türkdilli xalqlara məxsus mədəniyyət, tarixi irsin mühafizəsi və təbliğ edilməsi yönündə fəaliyyət göstərməkdədir. Hazırda Fondun dəstəyi ilə türkdilli xalqların tarixi-mədəni irsinin qorunması və təbliğ edilməsinə dair müxtəlif layihələr üzrə işlər aparılmaqdadır.
Bu layihələrdən biri “Dədə Qorqud” kamera orkestrinin yaradılmasıdır. Türk dünyasının ortaq yazılı abidəsi olan “Kitabi Dədə Qorqud”un baş qəhrəmanının adını daşıyan “Dədə Qorqud” kamera orkestri özündə türk dünyası dövlətlərinin musiqiçilərini birləşdirir. Orkestrın bədii rəhbəri və dirijoru Azərbaycanın xalq artisti, professor Yalçın Adıgözəlovdur.
“Dədə Qorqud” kamera orkestrı türk dünyasının zəngin mədəniyyət və incəsənətini, xalq yaradıcılığını, dahi bəstəkarlarının əsərlərini dünyada tanıtmaq məqsədi ilə fəaliyyət göstərir və bu istiqamətdə türkdilli xalqların musiqisini beynəlxalq platformada ifa edir.
Konsertdə Azərbaycanda rəsmi şəxslər, akkreditə olunmuş diplomatik nümayəndəliklər, beynəlxlaq təşkilat rəhbərləri, deputatlar, mədəniyət xadimləri iştirak edəcəklər.
Orkestr Azərbaycan Xalq Cumhuriyyətinin və Qafqaz İslam ordusunun yaradılmasının 100 illik yubileyləri münasibətilə 20 sentyabr Bakıda, Naxçıvan şəhərinin 2018-ci il üçün İslam mədəniyyətinin paytaxtı elan edilməsilə əlaqədar 22 sentyabr Naxçıvanda konsert proqramları ilə çıxış edəcək.
Tədbirlərdə türk dünyası bəstəkarlarının əsərləri, xalq mahnıları və türkülər səsləndiriləcəkdir.