Biləsuvar rayon Heydər Əliyev Mərkəzində görkəmli kinorejissor, Xalq artisti Tofiq Tağızadənin 100 illiyi ilə əlaqədar tədbir keçirilib. Tədbirdə şəhər məktəblərinin müəllim və məktəbliləri iştirak etmişlər.
Tədbiri giriş sözü ilə Mərkəzin direktoru Səyalə Şahbazova açmışdır. Ekran əsərləri ilə milli kino sənətimizə dəyərli töhfələr vermiş Tofiq Tağızadənin mənalı ömür yolu və zəngin yaradıcılığına nəzər salan S.Şahbazova bildirib ki, kinorejissorun lentə aldığı filmlərdə Azərbaycanın tarixi, mədəniyyəti və məişəti tamaşaçıya böyük ustalıqla çatdırılıb. Sənətkarın yüksək estetik meyarlarla xalqımızın mədəni irsini canlandıran və müasirlərinin həyatını dolğun əks etdirən rəngarəng mövzulu silsilə ekran əsərləri, o cümlədən “Uzaq sahillərdə”, “Arşın mal alan”, “Yeddi oğul istərəm” və “Dədə Qorqud” filmləri Azərbaycan kinosunun qızıl fonduna daxil olmuş parlaq sənət nümunələridir. Tofiq Tağızadənin respublikamızda kino işinin təşkili və kadr hazırlığı sahəsində də təqdirəlayiq xidmətləri qeyd olunmuşdur.
Sonda tədbir iştirakçılarına sənətkarın həyat və yaradıcılığından bəhs edən videoçarx nümayiş etdirilib.
