Beynəlxalq Türk Mədəniyyəti və İrsi Fondunun Prezidenti Bişkek şəhərinə səfəri çərçivəsində Fondun üzv dövlətlərinin Qırğızıstandakı səfirləri ilə görüşlər keçirmişdir
Beynəlxalq Türk Mədəniyyəti və İrsi Fondunun Prezidenti Günay Əfəndiyeva Bişkek şəhərinə səfəri çərçivəsində Fondun üzv dövlətlərinin Qırğızıstandakı səfirləri ilə görüşlər keçirmişdir.
Türkiyənin Qırğızıstandakı səfiri Mətin Kılıç ilə görüş zamanı türkdilli xalqların mədəni irsinin qorunması və təbliğ edilməsi məqsədilə Fondun gördüyü iş və layihələrin həyata keçirilməsinin əhəmiyyəti vurğulanmış, Türkiyə ilə gələcək əməkdaşlıq istiqamətləri qarşılıqlı şəkildə müzakirə edilmişdir.
Azərbaycanın Qırğızıstandakı səfiri Hidayət Orucov ilə keçirilmiş görüşdə Fondun Azərbaycan Respublikasının Prezidenti cənab İlham Əliyevin təşəbbüsü ilə təsis edildiyi, eləcə də Fondun fəaliyyət göstərməsi üçün Azərbaycanın aktiv rolu qeyd edilmiş, türkdilli xalqların tarixi-mədəni irsinin mühafizəsi, eyni zamanda Türk dünyasının birliyi naminə birgə tədbir və layihələrin reallaşdırılması ilə əlaqədar dəstək bildirilmişdir.
G.Əfəndiyeva Qazaxıstanın Qırğızıstandakı səfiri Aimdos Bozjigitov ilə də görüşmüşdür. Görüş zamanı Türk dünyasına xas mədəniyyətin, irsin daha da təbliğ edilməsinin və dünyaya tanıdılmasının vacibliyi qeyd edilmiş, Fondun bu istiqamətdə fəaliyyətinə və planlaşdırdığı layihələrinə dair dəstək ifadə edilmiş, Qazaxıstan ilə əməkdaşlığın inkişaf perspektivləri barədə fikir mübadiləsi aparılmışdır.