Noyabrın 11-də Şəki Regional Mədəniyyət İdarəsinin şəbəkəsində fəaliyyət göstərən Şəki şəhər 3 saylı Uşaq Musiqi Məktəbinin, Zaqatala və Qax rayonlarının mədəniyyət evlərinin istedadlı şagird və müəllimləri Ağdaş Regional Mədəniyyət İdarəsinin kollektivi qarşısında rəngarəng konsert proqramı ilə çıxış edib. Konsert Ağdaş şəhər 1 nömrəli Uşaq Musiqi Məktəbində təşkil olunub.
Ağdaş Regional Mədəniyyət İdarəsinin rəisi Tahir Əliyev tədbiri giriş nitqi ilə açaraq iştirakçıları salamlamışdır. Çıxışdan sonra konsert proqramı təqdim olunub. Konsert zamanı Anar Həsənovun ifasında “Ağdaşım”, “Şəki”, “Həyatımın qadını”, “Kəpənək”, “Baladadaşın ilk məhəbbəti” filmindən mahnı, “Aşqın vurduğu yerdə”, Pərviz Qəniyevin ifasında “Əsli Kərəm sevgisi”, “Səndən nigaranam”, “Çıx yaşıl düzə”, Murad Abduləzizovun ifasında “Bakının qara gözlü qızları”, “Ax, eto devuşka”, “Ədalətin bumu dünya” musiqiləri səsləndirilib. Zaqatala rayon Danaçı kənd folklor evinin “Alazan” rəqs qrupu “bersina yas (gözəl qız)” rəqsini, Qax rayon Əlibəyli kənd mədəniyyət evinin “İmedi” rəqs qrupu isə gürcü rəqsini ifa edib.
Sonda Şəki Regional Mədəniyyət İdarəsinin əməkdaşı Xatirə Səlimli çıxış edərək konsertin yüksək səviyyədə təşkil olunduğu üçün təşkilatçılara və musiqiçilərə təşəkkürünü bildirib, onlara gələcək fəaliyyətlərində ugurlar arzulayıb.