2 avqust 2018-ci il tarixində Azərbaycan Musiqi Mədəniyyəti Dövlət Muzeyinin filialı olan Niyazinin mənzil muzeyində görkəmli dirijor və bəstəkar, SSRİ Xalq artisti, Sosialist Əməyi Qəhrəmanı, Azərbaycan və SSRİ Dövlət Mükafatları laureatı, C.Nehru adına Beynəlxalq Mükafat laureatı Maestro Niyazinin anım gününə həsr olunmuş tədbir keçirilmişdir.
Niyazinin Fəxri xiyabandakı məzarı və yeni inşa olunmuş abidəsi ziyarət edilib, önünə əklillər qoyulmuş, Niyazinin mənzil muzeyində anım gününə həsr olunmuş tədbir keçirilmişdir.
Niyazinin mənzil muzeyinin direktoru, Əməkdar mədəniyyət işçisi Rza Bayramov tədbiri giriş sözü ilə açaraq Niyazinin dünya musiqi tarixində tutuduğu yer və verdiyi töhvələr haqqında məlumat vermişdir. Muzeyin elmi işçisi Əzirə Abdullayeva “Niyazi yaradıcılığında kino musiqisi” mövzusunda çıxış etmişdir. Daha sonra bəstəkar, Əməkdar incəsənət xadimi Məmmədağa Umudov Niyazi ilə bağlı xatirələrini bölüşmüşdür.
Çıxışlar muzeyin arxiv materialları əsasında hazırlanmış Niyazinin həyat və yaradıcılığını əks etdirən videoçarx və kinofilmlərdən fraqmentlərlə müşayiət olunmuşdur.
Tədbirdin bədii hissəsində vokalçı, musiqişünas Sevinc İbrahimova və beynəlxalq müsabiqələr laureatı, Prezident təqaüdçüsü Nəriman Əmiraslanov Niyazinin “Arzu”, “Vətən nəğməsi”, Q.Qarayevin “Mən sizi sevirdim” Ə.Abbasovun “Qurban olduğum”, Ədilə Hüsenyzadənin “Məhəbbətlə doğulmuşam” və digər görkəmli Azərbaycan bəstəkarlarının əsərlərindən ibarət konsert proqramı ilə çıxış etmişlər.