Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi (ASAN Xidmət) və “İnnovasiyalar Mərkəzi”nin birgə təşkilatçılığı ilə Masallı ASAN Həyat kompleksində Novruz adət-ənənələrini yaşatmaq və gələcək nəsillərə çatdırmaq məqsədilə “ASAN Həyat” Bahar Festivalı keçirilir. Mərasimdə Masallı rayon İcra Hakimiyyətinin başçısı Rafil Hüseynov, Masallı Regional Mədəniyyət İdarəsinin rəisi Lətifə Mövsümova, eləcə də digər yerli icra hakimiyyəti orqanlarının rəhbərləri və əməkdaşları, yerli ziyalılar, təhsil, mədəniyyət işçiləri və digərləri iştirak edirdi. Tədbirdə rayonun bir çox kəndlərinin xalq sənətkarlığı nümunələri, milli naxışlarla bəzədilmiş müxtəlif suvenir və məişət əşyaları, milli, o cümlədən bölgəyə xas olan yemək və şirniyyat çeşidlərindən ibarət sərgi nümayiş olundu. Bununla yanaşı, müxtəlif rayonları təmsil edən ASAN Xidmət Mərkəzləri, ABAD, İctimai Birliklər, kommersiya qurumları, eləcə də incəsənət və digər yaradıcı kollektivlər, Masallı rayon Tarix-Diyarşünaslıq muzeyi və başqaları təklif etdikləri məhsul və xidmətləri çadırlarda və açıq havada qurulmuş sərgi və satış yarmarkalarında təqdim etdilər. Tədbirdə Novruzu qeyd edən digər dövlətlərin - İran İslam Respublikası, Türkmənistan və Özbəkistan Respublikalarının nümayəndələri də festivalda sərgi ilə iştirak edirdi.
Tədbirdə yerli incəsənət ustaları - Masallı rayon Mədəniyyət Mərkəzinin musiqi ifaçıları, solistləri və rəqs qruplarından ibarət kollektivi maraqlı musiqi və rəqs kompozisiyaları ilə çıxış etdilər. Festivalın ilk gününə iştirakçılar arasında keçirilən viktorina ilə yekun vuruldu.
Xatırladaq ki, festival 19 mart tarixinədək davam edəcək.
