Mingəçevir Turizm Kollecinin kollektivi milli əlamətdar təqvimlərin bəzəyi hesab edilən Novruz bayramını böyük coşqu ilə qeyd edib. Milli rəmzi xüsusiyyətlər və Novruz elementləri ilə tərtib edilmiş kollec meydanında bir araya gələn tələbə, müəllim, valideyn və digər dəvətli qonaqlar saatlar ərzində bayram tonqalı ətrafında unudulmaz anlar yaşayaraq bayramın keyfini çıxarıb. Şux rəqslər, milli və müasir musiqilər, poetik nümunələr, Novruz inancları ilə bağlı səhnəciklər, Novruzun rəmzləri olan Keçəl, Kosa, Bahar qız və Qorqud atanın bayram təbrikləri şənliyin ovqatını yüksəldərək tədbirdə əsl bayram coşqusu yaradıb.
Kollektivi və tədbir iştirakçılarını Novruz bayramı münasibətilə təbrik edən kollecin direktoru Əyyub Əyyubov ən xoş arzularını paylaşıb. Novruzun oyanış, gözəllik, təravət, bolluq, birlik və sevgi bayramı olduğunu bildirib.
Tədbirdə Keçəl və Kosanın zarafatları xeyli əyləncə yaradıb.Qorqud ata və Bahar qızın təbrikləri meydanı coşdurub. Rəqslər və ifalar biri-birini əvəz edib. Xalq oyunlarından olan kəndirdartışması, dirədöymə, milli geyimli qızların Novruz inanclarından bəhs edən səhnəcikləri xoş ovqat yaradıb.
Qeyd edək ki, şənlik ərzində kollec həmkarlar təşkilatının rəhbərliyi, aparıcı mütəxəssislər, pedaqoq və tələbələr də çıxış edərək bayram təbriklərini ifadə edib.
Bayram şənliyində həmçinin Novruz münasibətilə təşkil olunmuş idman turnirləri və müsabiqə qalibləri təltif olunub.
Nəhayət Qorqud atanın müşayəti ilə Novruz tonqalı alovlandırılıb. Kollektiv əl-ələ və çiyin-çiyinə bayram tonqalı ətrafında Yallı gedərək Novruzun həm də milli birlik rəmzi olduğunu qürurla nümayiş etdirib.
