Nazir müavini Sevda Məmmədəliyeva ilə UNESCO təşkilatının Baş direktorunun mədəniyyət məsələləri üzrə müavini Ernesto Ottone Ramirez arasında görüş keçirildi
2019-cu ilin 20 mart tarixində Azərbaycan Respublikasının Mədəniyyət nazirinin müavini Sevda Məmmədəliyeva UNESCO-nun mənzil qərargahında təşkilatın Baş direktorunun mədəniyyət məsələləri üzrə müavini Ernesto Ottone Ramirez ilə görüşmüşdür. Görüş Novruz bayramına təsadüf etdiyindən, Sevda Məmmədəliyeva Azərbaycan xalqı üçün bu bayramın əhəmiyyətindən danışmış, Novruzun 2009-cu ildə UNESCO-nun Qeyri- Maddi Mədəni İrs üzrə Reprezentativ Siyahısına salınmasından məmnunluğunu ifadə etmiş və bu münasibətlə mart ayının 20-də UNESCO-nun qərargahında görkəmli muğam ustası Alim Qasımovun iştirakı ilə konsertin keçiriləcəyini qeyd etmişdir. Nazir müavini, Azərbaycanın qədim musiqi alətləri olan tar və kamançanın, habelə muğam sənətinin UNESCO-da Qeyri-Maddi Mədəni İrs nümunəsi kimi tanındığını vurğulamışdır.
Sevda Məmmədəliyeva Azərbaycan-UNESCO münasibətləri barədə danışmış və münasibətlərin son illər ərzində daha da dərinləşməsində Azərbaycan Respublikasının
Birinci vitse-prezidenti, UNESCO-nun xoşməramlı səfiri Mehriban xanım Əliyevanın xüsusi rolunu qeyd etmişdir.
Daha sonra nazir müavini cari ilin 30 iyun – 10 iyul tarixlərində UNESCO-nun Baş direktoru Odre Azulenin də qatılacağı Ümümdünya İrs Komitəsinin Bakıda keçiriləcək 43-cü sessiyası ilə bağlı hazırlıq işləri barədə qarşı tərəfə məlumat vermiş və sessiyanın ən yüksək səviyyədə təşkil ediləcəyini vurğulamışdır.
Baş direktorun müavini E.Ramirez Azərbaycan və UNESCO arasındakı münasibətlərin yüksək səviyyədə olmasından, ölkəmizin təşkilatın işində yaxından iştirak etməsindən və UNESCO dəyərlərinin təşviqində mühüm rol oynamasından məmnunluğunu ifadə etmiş və ölkəmizə təşəkkürünü bildirmişdir. Azərbaycanın sədrliyi ilə keçəcək Ümumdünya İrs Komitəsinin iclasının uğurla təşkil ediləcəyinə əminliyi bildirən Baş Direktorun müavini UNESCO-nun bu mühüm tədbirində şəxsən iştirak edəcəyindən məmnun olduğunu bildirmişdir. Görüşdə Azərbaycanın UNESCO yanında daimi nümayəndəsi, səfir Anar Kərimov və Ümumdünya İrs Mərkəzinin direktoru Metşild Rossler iştirak etmişdir.