Bərdə Regional Mədəniyyət İdarəsi Mingəçevir şəhər Heydər Əliyev Mərkəzində “Qəhrəmanlıq tariximizin 20 Yanvar səhifəsi” mövzusunda anım tədbiri keçirib.
Tədbirdə regional idarənin Mingəçevir şəhər üzrə Gənc Mədəniyyət İşçiləri Kreativ Qrupunun üzvləri, Mədəniyyət könüllüləri və şəhər 3 nömrəli tam orta məktəbin şagirdləri iştirak ediblər.
Əvvəlcə Vətən uğrunda canından keçən şəhidlərin xatirəsi bir dəqiqəlik sükutla yad olunub.
Mərkəzin direktor əvəzi Tutu Xanlarova Azərbaycanın suverenliyi, istiqlaliyyəti və ərazi bütövlüyü uğrunda mübarizənin rəmzi olan 20 Yanvar tarixinin mahiyyəti barədə danışaraq qeyd edib ki, 1990-cı ilin 20 Yanvar hadisələri keçmiş sovet dövlətinin Azərbaycan xalqına qarşı həyata keçirdiyi hərbi təcavüz və insanlığa qarşı törədilmiş ən ağır cinayət idi. Mərkəzi hökumətə arxalanan ermənilərin Dağlıq Qarabağa qarşı təcavüzünə etiraz edən dinc əhaliyə yönəldilmiş silahlı basqın nəticəsində yüzlərlə günahsız insan qətlə yetirildi. Bununla da totalitar sovet rejimi cinayətkar mahiyyətini bütün dünyaya bir daha nümayiş etdirdi.
Çıxış edən gənc mədəniyyət işçiləri və mədəniyyət könüllüləri vurğulayıblar ki, əsrlər keçsə də, 20 Yanvar faciəsi heç vaxt yaddan çıxmayacaq, dönə-dönə xatırlanacaqdır. Şəhidlərimizin qanının hədər axmadığını, o qanlar bahasına bugünkü azadlığımızın, müstəqilliyimizin, dövlət quruculuğumuzun, qüdrətli Azərbaycanın bünövrəsinin qoyulduğunu gələcək nəsillər də böyük ehtiramla xatırlayacaqlar.
Tədbirin sonda "Qanlı Yanvar hadisələri" adlı filmə baxış keçirilib.