Respublika Gənclər Kitabxanası tərəfindən “20 yanvar” faciəsinə həsr edilmiş tədbirlər keçirildi
Müstəqilliyə gedən yolda xalqımızın şərəf və qəhrəmanlıq salnaməsi sayılan 1990-cı ilin qanlı “20 yanvar” faciəsindən 29 il ötür. Cəfər Cabbarlı adına Respublika Gənclər Kitabxanası tərəfindən hər il olduğu kimi bu il də xalqımıza, torpaqlarımıza qarşı törədilən təcavüzlə əlaqədar tədbirlər təşkil edilmişdir.
“20 yanvar - şərəf və qürur günümüz” adlı biblioqrafik icmal hazırlanıb Respublika Gənclər Kitabxanasının rəsmi saytında yerləşdirilmişdir. Oxucularla “20 yanvar faciəsi” adı altında müzakirə aparılmış, Azərbaycanın Milli Qəhrəmanları Gültəkin Əsgərova və Şirin Mirzəyevə həsr olunmuş filmlərə baxış keçirilmişdir.
Qeyd edək ki, “Qanlı 20 yanvar tarixi” adlı kitab sərgisinə baxış ayın sonunadək davam edəcəkdir.
* * *
16 yanvar 2019-cu il tarixində Kitabxana tərəfindən “O günü unutmayaq” adı altında qanlı yanvar faciəsində şəhid olanların ailə üzvləri ilə Şəhidlər Xiyabanında görüş təşkil edilmişdir.
Kitabxananın elmi işlər üzrə direktor müavini Xalidə Musayeva çıxış edərək 1990-cı ildə Bakıda “20 Yanvar” və Azərbaycan tarixində daha əvvəl baş vermiş faciəli hadisələr barədə məlumat verdi.
“20 yanvar” şəhidlərindən olan İlham Allahverdiyevin yaxın qohumu və dostu, faciə baş verəndən bu günədək “Şəhidlər Xiyabanı”nda mühafizəçi vəzifəsində çalışan Füzuli Quliyev o qanlı günün canlı şahidi kimi təəssüratlarını bildirdi. İlhamın necə vətənpərvər, xalqını, millətini sevən mübariz Azərbaycan oğlu olması, vaxtsız həyatını itirməsi haqda ürək ağrısı ilə danışdı.
Tədbir Azərbaycanın şərəf və qəhrəmanlıq salnaməsini yazan şəhidlərin məzarları üstünə gül dəstələri qoymaqla başa çatdı.