İstiqlal Muzeyinin ekspozisiyasında “Sağalmayan yara” adlı tədbir-sərgi keçiriləcək
Azərbaycan Respublikası Prezidenti Administrasiyası rəhbərinin “20 Yanvar faciəsinin iyirimi səkkizinci ildönümünün keçirilməsi ilə bağlı tədbirlər planı”na əsasən 2018-ci il yanvarın 18-də saat 12:00-da Azərbaycan İstiqlal Muzeyinin ekspozisiyasında “Sağalmayan yara” adlı tədbir-sərgi keçiriləcək.
1990-cı il yanvarın 19-dan 20-nə keçən gecə Bakıda misli görünməmiş faciə baş vermişdir, nəticədə yüzlərlə günahsız insan qətlə yetirilmiş və yaralanmışdır. 1994-cü ildə Azərbaycan xalqının Ümummilli Lideri Heydər Əliyev 20 Yanvar hadisələrinə siyasi-hüquqi qiymət vermiş və 20 Yanvar – Ümumxalq Hüzn Günü elan edilmişdir.
Sərgidə muzeyə yenə daxil olmuş 20 Yanvar şəhidlərinin şəxsi əşyaları nümayiş olunacaq.
Tədbirdə Azərbaycan İstiqlal Muzeyinin direktoru Fəridə Şəmsi, 20 Yanvar Fondunun sədri Maral Zamanova Qocaman, 20 Yanvar şəhidi Baxışıyev Salmanın həyat yoldaşı Baxışıyeva Məryəm, 20 Yanvar faciəsinin şahidi və iştirakçısı Əsədov Hicran, 20 Yanvar şəhidi Məmmədov Şahinin bacısı qızı Hüseynova Şəmsiyyə çıxış edəcəklər, sonda Azərbaycan Dövlət Mədəniyyət və İncəsənət Universitetinin “Teatr sənəti və Musiqi sənəti” fakültəsinin tələbərinin hazırladığı bədii hissə təqdim olunacaq.
Tədbirdə Azərbaycan Dövlət Mədəniyyət və İncəsənət Universitetinin tələbə və müəllim heyəti, Milli Qvardiyanın əsgərləri, Sərhəd Qoşunların şəxsi heyəti və digər qonaqlar iştirak edəcəklər.