VII Beynəlxalq Mədəni Forum çərçivəsində Mədəni Proqramlar İnstitutunun rəhbərliyi ilə görüş keçirildi
Məlum olduğu kimi, Rusiyanın Sankt-Peterburq şəhərində təşkil olunan VII Beynəlxalq Mədəni Forumunda eyni zamanda mədəniyyət sahəsində ixtisaslaşmış rəsmi dövlət qurumlarının rəhbərləri, mədəniyyət menecerləri, alim və mütəxəssislər iştirak edir.
Forum çərçivəsində təşkil olunmuş bir neçə tədbirdə Azərbaycan nümayəndə heyətinin üzvü, Mədəniyyət Nazirliyinin Mədəniyyətşünaslıq üzrə Elmi-Metodiki Mərkəzinin direktoru Asif Usubəliyev iştirak etmişdir.
A.Usubəliyevin forum çərçivəsində təşkil edilən panellərdən birinin sahibi olan Mədəni Proqramlar İnstitutunun rəhbərliyi ilə görüşü keçirilmişdir. Görüş zamanı iki müəssisə arasında əməkdaşlıq perspektivləri müzakirə edilmiş və əməkdaşlıq memorandumunun imzalanmasına dair razılıq əldə edilmişdir. Gələcək əməkdaşlığın prioritet istiqamətlərindən biri mədəniyyət sahəsində çalışan mütəxəssislər üçün müxtəlif təyinatlı təlimlərin keçirilməsidir. Belə ki, mövcud istiqamətlərdə görülmüş işlər barəsində geniş məlumat verilmiş və faydalı ola biləcək əməkdaşlıq məsələləri müzakirə olunmuşdur.
Rusiyanın Mədəni Proqramlar İnstitutunun rəhbəri Yelena Smirnova əməkdaşlıq əlaqələrinin yaradılmasında maraqlı olduqlarını bildirmişdir. Aparılmış danışıqlar nəticəsində müəyyən olunmuşdur ki, əməkdaşlıq əsasən metodiki vəsaitlərin və tədris proqramlarının hazırlanması habelə birgə beynəlxalq təlimlərin keçirilməsi kimi sahələri əhatə edəcəkdir.
Mədəni Proqramlar İnstitutunun rəhbərliyi eyni zamanda mədəniyyət üzrə ixtisaslaşmış təlimçilər üçün də xüsusi tədris proqramlarının hazırlanmasında maraqlı olduqlarını bildirmişdir.
Birgə keçirilməsi nəzərdə tutulan təlimlər muzey, teatr, kitabxana, mədəniyyət evləri habelə mədəniyyət idarələrinin rəhbərləri üçün müasir mədəniyyət menecmenti mövzusunu əhatə edəcək ixtisaslaşmış proqramları əhatə edəcəkdir. Əməkdaşlıq çərçivəsində təcrübə ezamiyyələrinin də təşkili də nəzərdə tutulmuşdur.