Xaçmaz Tarix Diyarşünaslıq muzeyində "18 May Beynəlxalq Muzeylər günü"nə həsr olunmuş "Misli olmayan xəzinə" adlı tədbir keçirilmişdir.
İCOM Azərbaycan Milli komitəsinin təsis etdiyi "Muzeylər mədəniyyət mərkəzi kimi-ənənələrin gələcəyi" mövzusu əsasında hazırlanmış tədbir muzeylərin tariximizin, adət ənənələrimizin qorunması, mənəvi dəyərlərimizin yaşadılması baxımından necə böyük əhəmiyyət daşımasına həsr olunmuşdu.
Tədbiri giriş sözü ilə muzeyin direktoru Pakizə Mehdiyeva açaraq muzeyin uğurlu fəaliyyətindən, ilk yarımildə keçirilmiş tədbirlərdən danışdı."İlin muzeyi " adını almış bir müəssisə kimi bu ada layiq olmaq üçün daha uğurlu layihələr həyata keçirəcəklərini qeyd etdi.
Xaçmaz Regional Mədəniyyət İdarəsinin əməkdaşı Fərid Musayev çıxış edərək bu əlamətdar günün yaranma tarixindən danışdı, muzey işçilərini təbrik edərək, onlara öz fəaliyyətlərində daha böyük uğurlar arzuladı.
Sonra Xaçmaz rayon Heydər Əliyev adına Mədəniyyət Mərkəzinin direktoru Aqil Əlisultanov çıxış edərək muzey işinin necə şərəfli bir peşə olduğunu vurğulayaraq, bir zamanlar özünün çalışdığı bu kollektivə yeni-yeni uğurlar dilədiyini bildirdi.
Dərnək üzvləri tərəfindən muzeyin fəaliyyətinə həsr olunmuş mətn təqdim olunduqdan sonra bədii hissəyə start verildi. Rəngərang mahnı və rəqslər tədbir iştirakçılarına əsl bayram əhval ruhiyyəsi yaşatdı. Tədbirdə, muzeyin Akademik Zərifə Əliyeva adlı 8 saylı orta mətəbində təhsil alan dərnək üzvləri, M.Babayev adına 1 saylı orta məktəbin şagirlərinin musiqili çıxışları tədbirə xüsusi rəng qatdı.
Tədbirdə muzeyin fəaliyyətini əks etdirən fotostenddə nümayiş olundu.