Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV
28.09.2021 19:02
Mehmandarovların malikanə kompleksi ilə bağlı Mədəniyyət Nazirliyinin məlumatıŞuşada yerləşən Mehmandarovların malikanə kompleksi Mehmandarovlar ailəsinə məxsusdur və Azərbaycanın tarix-memarlıq abidələrindən biridir. Azərbaycan xanlıqlarının, o cümlədən, Qarabağ xanlığının idaretmə sistemində bir çox mülki və hərbi vəzifələri yerinə yetirən Mehmandarov nəslinin nümayəndələri tərəfindən XVIII əsrin tarixi-memarlıq abidəsi sayılan Mehmandarovların malikanə kompleksi inşa olunub. Şuşa şəhərində yerləşən Mehmandarovların malikanə kompleksinə böyük yaşayış evi, kiçik yaşayış evi və məscid daxildir. Həmçinin daha sonralar məscidə gedən yolun üstündə bulaq tikilib. Mehmandarovların malikanə kompleksi ilk dəfə 1977-78-ci illərdə Azərbaycan SSR Mədəniyyət Nazirliyi tərəfindən pasportlaşdırılıb. Mehmandarovların böyük yaşayış binası sovet dönəmində Şuşa Şəhər Xəstəxanası kimi fəaliyyət göstərib. 19 may 1987-ci il tarixindən vaxtilə Mehmandarovlar ailəsinə məxsus olan yaşayış kompleksində Azərbaycan Xalçası və Xalq Tətbiqi Sənəti Dövlət Muzeyinin (indiki Azərbaycan Milli Xalça Muzeyi) Şuşa filialı fəaliyyətə başlayıb. 1992-ci ildə Şuşa şəhəri Ermənistan silahlı qüvvələri tərəfindən işğala məruz qaldığı üçün filialdakı daşınması mümkün olan eksponatlar təxliyyə olunaraq Bakıya gətirilib. Bildirilib ki, müharibə dövründə Mehmandarovların malikanə kompleksinə də ciddi ziyan dəyib, dağıntılar törədilib. Mülkdə olan əksər tikililər yerləyeksan edilib. Mehmandarovların kiçik yaşayış binası isə ermənilər tərəfindən Şuşa Tarix Muzeyi kimi fəaliyyət göstərirdi. Kompleks ərazisindəki məscid isə ermənilər tərəfindən mənimsənilmiş və Geologiya Muzeyinə çevrilmişdi. İşğaldan azad olunan ərazilərimizdə Azərbaycan dövləti tərəfindən həyata keçirilən nəhəng yenidənqurma işləri, o cümlədən Şuşada aparılan bərpa və quruculuq prosesi Şuşanın orijinal memarlıq üslubuna uyğun olaraq gerçəkləşdirilir. Həyata keçirilən işlər çərçivəsində Mehmandarovların malikanə kompleksi də bərpa edilir. Hal-hazırda Mehmandarovların malikanə kompleksində təmir-bərpa işləri aparılır. ..
28.09.2021 12:01
Qarabağ qazisi işlə təmin olunubVətən müharibəsinin fəal iştirakçısı Salayev Rauf Yasər oğlu Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Salyan regional idarəsinin Lənkəran rayonu üzrə Baş mütəxəssis-abidə mühafizəçisi vəzifəsinə işə qəbul edilib. Bununla əlaqədar Dövlət Xidmətinin rəisi Azad Cəfərli qəhrəman döyüşçümüzü qəbul edib. Ona gələcək fəaliyyətində uğurlar arzulayıb. Qeyd edək ki, Rauf Salayev İkinci Qarabağ müharibəsində Füzuli, Cəbrayıl, Zəngilan və Qubadlı rayonu istiqamətlərində gedən döyüşlərdə fəal iştirak edib. Azərbaycan Respublikası Prezidentinin müvafiq Sərəncamları ilə “Cəbrayılın azad olunmasına görə”, “Qubadlının azad olunmasına görə” və “Cəsur döyüşçü” medalları ilə təltif edilib. ..
27.09.2021 10:49
“TÜRKSOY Media Mükafatı” ilə təltif olunan media təmsilçiləri Şuşa şəhərinə səfər ediblərSentyabrın 26-da Mədəniyyət Nazirliyi və Beynəlxalq Türk Mədəniyyəti Təşkilatının (TÜRKSOY) birgə təşkilatçılığı ilə “TÜRKSOY Media Mükafatı” ilə təltif olunan yerli və xarici media təmsilçiləri Şuşa şəhərinə səfər ediblər. Mədəniyyət Nazirliyi Aparatının rəhbəri Vasif Eyvazzadə, Türkiyənin Trabzon Ortahisar Bələdiyyəsinin başqanı Ahmet Metin Genç, nazirliyin və TÜRKSOY-un məsul nümayəndələrinin də iştirak etdiyi səfər zamanı media təmsilçiləri Azərbaycanın mədəniyyət beşiyi olan Şuşanın tarixi-mədəni irsi, 28 ildən artıq davam etmiş erməni işğalı dövründə dağıdılıb talan edilmiş tikililər, vandalizmə məruz qalmış abidələr, məscidlər, eləcə də Şuşanın işğaldan azad edilməsindən sonra başlanan quruculuq işləri ilə tanış olublar. Yerli və xarici media təmsilçiləri şəhərin mərkəzi meydanı – “Bazarbaşı”nı, erməni vandalizminə məruz qalmış “Güllələnmiş heykəllər”i – Üzeyir Hacıbəylinin, Xurşudbanu Natəvanın, Bülbülün büstlərini, 2021-ci il iyunun 15-də Azərbaycan və Türkiyə prezidentləri tərəfindən tarixi Şuşa Bəyannaməsinin imzalandığı məkanı, Natəvanın evini, “Xan qızı bulağı”nı, Şuşa qalasının girişi olan Gəncə qapısını, Aşağı Gövhər ağa və Yuxarı Gövhər ağa məscidlərini, Cıdır düzünü, bu ilin avqustunda bərpa edildikdən sonra açılışı keçirilən Molla Pənah Vaqifin məqbərəsini, Bülbülün ev-muzeyini və digər yerləri ziyarət ediblər. Qarabağın incisi olan qədim Şuşanın tarixi, mədəniyyəti, dahi şəxsiyyətləri və bu gün ölkə rəhbərliyinin tapşırığı ilə burada aparılan genişmiqyaslı quruculuq işləri, şəhərin tarixi görkəminin, zəngin mədəni irsinin bərpası ilə bağlı həyata keçirilən layihələr barədə media nümayəndələrinə ətraflı məlumat verilib. Qeyd edək ki, Beynəlxalq Türk Mədəniyyəti Təşkilatının “TÜRKSOY Media Mükafatı” ənənəvi olaraq hər il təqdim edilir. 2020-ci il üzrə mükafatlara 44 günlük Vətən müharibəsi dövründə yaşanan hadisələri, Azərbaycanın haqq işini, Qarabağ həqiqətlərini dünya ictimaiyyətinə obyektiv çatdıran və yayımlayan yerli və xarici media təmsilçiləri layiq görülüb. Təqdimat mərasimi sentyabrın 25-də Beynəlxalq Muğam Mərkəzində keçirilib. Mükafata Azərbaycan, Türkiyə, Qazaxıstan, Xorvatiya, Özbəkistan və Qırğızıstandan media təmsilçiləri, o cümlədən bu il iyunun 4-də Kəlbəcər rayonu ərazisində mina partlaması nəticəsində şəhid olmuş azərbaycanlı jurnalistlər Məhərrəm İbrahimov və Sirac Abışov layıq görülüblər. ..
27.09.2021 10:10
TÜRKSOY-un media mükafatları təqdim olunduTəşkilat builki mükafatları 44 günlük Vətən müharibəsinə həsr edib. Sentyabrın 25-də Beynəlxalq Muğam Mərkəzində Mədəniyyət Nazirliyinin təşkilatçılığı ilə TÜRKSOY-un media mükafatının təqdimat mərasimi keçirildi. İlk olaraq Vətən müharibəsi şəhidlərinin əziz xatirəsi bir dəqiqəlik sükutla yad edildi. Daha sonra bu il iyunun 4-də Kəlbəcər rayonunun Susuzluq kəndi ərazisində çəkiliş apararkən düşmənin basdırdığı minaya düşərək şəhid olan Azərbaycan Dövlət İnformasiya Agentliyinin (AZƏRTAC) müxbiri Məhərrəm İbrahimov və Azərbaycan Televiziyasının (AzTV) operatoru Sirac Abışovdan bəhs edən film nümayiş etdirildi. Tədbirdə çıxış edən mədəniyyət naziri Anar Kərimov qonaqları salamlayaraq dedi ki, Azərbaycan xalqı bu günü 30 ildir gözləyirdi. Bu illər ərzində insanların öz yurd-yuvasından qovulması, Xocalı qətliamı, ermənilərin xalqımıza qarşı törətdiyi vəhşiliklər, tarixi və mədəni abidələrimizin dağıdılması bizi sarsıdırdı: “Bütün bu ədalətsizliyə dünya səssiz qalırdı. Azərbaycan xalqı bununla barışmadı və özü ədaləti bərpa etdi. Dövlət başçımıza və rəşadətli Ordumuza təşəkkür edirik ki, bizi bu döyüşdən alnıaçıq, üzüağ çıxardılar. Bu, Azərbaycan üçün bir şərəf məsələsi idi. Bu haqq savaşına təkcə Ordumuz deyil, ürəyi Azərbaycanla döyünən Türk dünyası da töhfə verdi. Biz bütün sahələrdə olduğu kimi, bu dəstəyi informasiya savaşında da hiss etdik. Fürsətdən istifadə edib bütün Türk dünyasına və yanımızda olan media nümayəndələrinə təşəkkür edirəm”. Builki media mükafatını Qarabağ savaşına həsr etdiyi üçün TÜRKSOY-un Baş katibi Düsen Kaseinova minnətdarlığını bildirən nazir tədbirdə iştirak edən dünya şöhrətli fotoqraf soydaşımız Rza Diqqəti və türkiyəli telejurnalist Fülya Öztürkün Azərbaycanın haqq mübarizəsinə verdikləri dəstəyi yüksək qiymətləndirdi: “Rza bəy I Qarabağ savaşında da Xocalı soyqırımının dünya ictimaiyyətinə çatdırılmasında böyük əmək sərf etmişdi. İnanıram ki, Qarabağın yenidən quruculuğunda da siz media nümayəndələri bizim yanımızda olacaqsınız. Azərbaycan və Türk dünyası regiona və dünyaya hər zaman sülh mesajı verir, beynəlxalq hüququ müdafiə edir. Bölgənin yenidən inkişafa qədəm qoyması üçün biz nazirlik olaraq “Mədəniyyət naminə sülh“ kampaniyasına başlamışıq. İnanıram ki, bu layihə sizlər tərəfindən işıqlandırılaraq dünyaya yayılacaq. Bir daha sizin hamımıza təşəkkür edir, işlərinizdə uğurlar arzulayıram“. Daha sonra TÜRKSOY Baş katibinin müavini Bilal Çakıcı çıxış edərək Düseyn Kaseinovun salamlarını çatdırdı. Vurğuladı ki, türk xalqlarının tarixi şanlı zəfərlə doludur. Bu tarixə 2020-ci ildə Azərbaycan daha birini əlavə etdi. “TÜRKSOY-un 2009-cu ildən təsis etdiyi media mükafatı bu il Azərbaycanın Vətən müharibəsini işıqlandıran media nümayəndələrinə təqdim olunur. Vətəni Azərbaycanın Şuşa şəhəri olan Xarıbülbül çiçəyini simvolizə edən bu mükafat sizi işlərinizdə daha böyük nailiyyətlərə səsləyir”, - deyə Bilal Çakıcı əlavə etdi. Daha sonra mükafatlar təqdim olundu. Nazir Anar Kərimov şəhid jurnalistlər Məhərrəm İbrahimov və Sirac Abışovun mükafatını qardaşlarına təqdim etdi. M.İbrahimovun qardaşı Əsgər İbrahimov və S.Abışovun qardaşı Şirzad Abışov təltifə görə təşəkkürlərini bildirdilər. Onların qardaşları ilə fəxr etdiklərini dedilər. Mükafatı alan Rza Diqqəti şəhid jurnalistlərlə bağlı xatirələrini bölüşdü. Dedi ki, müharibənin səssiz qəhrəmanları da olur: “Mən bu mükafatı şəhid ailələrinə həsr edirəm”. Fülya Öztürk Azərbaycandan gördüyü sevgiyə görə qürur duyduğunu bildirdi, müharibə vaxtı çəkilişlərə öz istəyi ilə gəldiyini diqqətə çatdırdı. Trabzon Ortahisar Bələdiyyəsinin sədri Ahmet Metin Genç səhnəyə dəvət ediləndə diqqətə çatdırıldı ki, 44 günlük Vətən müharibəsi gedişində bələdiyyə Azərbaycan bayrağı qaldırıb. Bələdiyyə sədrinə xüsusi mükafat təqdim edildi. A.M.Genç də öz növbəsində nazir Anar Kərimova kiçik hədiyyə təqdim etdi. Daha sonra Türkiyə, Qazaxıstan, Xorvatiya, Azərbaycan, Özbəkistan, Qırğızıstandan olan jurnalistlərə TÜRKSOY-un media mükafatları verildi. Tədbir Beynəlxalq Muğam Mərkəzi solistlərinin ifasında “Qarabağ şikəstəsi” ilə yekunlaşdı. ..
24.09.2021 18:28
Tarixi mənbə və nümunələr əsasında hazırlanan milli geyimlərə baxış keçirilibGeyim mədəniyyəti maddi mədəniyyətin ən mühüm sahələrindən biridir. Mədəniyyət Nazirliyinin təşəbbüsü ilə “İnkişaf Korporasiyası” QSC tərəfindən tarixi mənbə və nümunələr əsasında müvafiq araşdırmalar aparılmaqla Azərbaycan milli geyim standartları hazırlanıb. Mədəniyyət nazirinin birinci müavini Elnur Əliyev və “İnkişaf Korporasiyası”nın icraçı direktoru Vüsal Qasımov hazırlanan milli geyim standartları ilə tanış olublar.   Mədəniyyət nazirinin birinci müavini Elnur Əliyev bildirib ki, zəngin tarixə malik olan, XX əsrin əvvəllərinə qədər böyük bir inkişaf yolu keçmiş milli geyimlərimiz dövrün və siyasi quruluşun dəyişməsi, Avropa mədəniyyətinin məişətimizə sirayət etməyə başlaması ilə tarixə qovuşaraq indi əsasən muzey kolleksiyalarında saxlanılır. Son dövrlər etnodəbin gündəmə gəlməsi ilə aktuallaşan milli geyimlərimiz əksər hallarda öz orijinal formasından tamamilə fərqli əlavə və dəyişikliklərə məruz qalır. Bu isə çox mənfi bir tendensiya olmaqla, gənclərin milli geyimlərlə bağlı yanlış məlumatlanmasına gətirib çıxarır, eyni zamanda hər an maddi-mənəvi dəyərlərimizi mənimsəməyə hazır olan qonşular üçün fürsət verir. Odur ki, maddi mədəniyyətin ən mühüm atributlarından biri olan milli geyimlərin yad əllərə düşməsinin, başqa millətlər tərəfindən özününküləşdirilməsinin qarşısını almaq üçün onun düzgün öyrənilməsi və təbliği çox vacibdir.  Sonda qeyd olunub ki, geyim mədəniyyətimiz dünyaya səs salan xalçalarımız və muğam sənətimiz qədər zəngin və qədimdir, türk xalqlarının dünya mədəniyyətinə bəxş etdiyi böyük töhfələrdəndir. Bu sərvətlərlə fəxr etmək mənəvi haqqımız, onu öyrənib-öyrətmək, gələcək nəsillərə sağlam və toxunulmaz şəkildə ötürmək isə borcumuzdur. ..
24.09.2021 17:19
Azərbaycan Beynəlxalq Kitab Sərgi-Yarmarkasında iştirak edir24 sentyabr 2021-ci il tarixində Rusiya Federasiyasının paytaxtı Moskva şəhərində Ekspo Mərkəzində 34-cü Moskva Beynəlxalq Kitab Sərgi-Yarmarkasının açılışı olub. Sərgidə Azərbaycan Respublikasının Mədəniyyət Nazirliyinin Kitab sənayesi şöbəsinin müdiri Akif Marifli, əməkdaşlar İslam Hüseynov və Kamran Musayev iştirak edirlər. 10 ölkədən artıq və 200-dən çox nəşriyyatların iştirak etdiyi sərgi cari ilin 27 sentyabr tarixində başa çatacaqdır. Sözügedən tədbirdə Azərbaycan mədəniyyətini, ədəbiyyatını, incəsənətini, tarixini və coğrafiyasını əks etdirən kitablar sərgilənir. Sərginin ötənilki sərgilərdən fərqi oxucuların daha çox Qarabağla bağlı kitablara diqqət yetirməsi olub. Digər maraqlı məqam isə artıq neçə illərdir ki, Ermənistan stendində sərgilənən və erməni mifologiyasını təbliğ edən Qarabağla bağlı kitablara rast gəlinmir. Müzəffər Azərbaycan Ordusunun döyüş meydanında tarixi ədaləti bərpa etməsi dünya oxucusunun Qarabağa olan marağının daha da artırmasına vüsət yaratmışdır. Azərbaycan Respublikası Prezidentinin rəhbərliyi altında Ordumuzun Qarabağı Ermənistan işğalından azad etməsindən sonra dünya ictimaiyyətinin, dünya oxucusunun Qarabağa marağı daha da artdığı açıq şəkildə hiss olunur. Bundan başqa ölkə rəhbərinin Nizami Gəncəvi ili elan etməsi və bu qəbildən yerli və beynəlxalq tədbirlərin keçirilməsi nəticəsində xarici gənc oxucuların Nizami haqqında yeni nəşrlərlə maraqlanması da ürəkaçan bir hadisədir. Bu da öz növbəsində Azərbaycan mədəniyyətinin dünyaya daha da tanıdılması üçün uğurlu təbliğat vasitəsidir. ..
24.09.2021 16:29
“Üzeyir Hacıbəyliyə ithaf” beynəlxalq müsabiqəsinin yekun konserti keçirilibBeynəlxalq Muğam Mərkəzində ABŞ-da təşkil edilən“Üzeyir Hacıbəyliyə ithaf” beynəlxalq müsabiqəsinin yekun konserti baş tutub. Tədbirdə Mədəniyyət naziri Anar Kərimov, Türkiyənin Azərbaycandakı səfirinin müavini Barış Sayqın, Kolumbiyanın Azərbaycandakı səfiri, İsrailin Azərbaycandakı səfirinin müavini, Qazaxıstanın və Britaniyanın Azərbaycandakı səfirliyinin nümayəndələri iştirak ediblər. Konserti ön sözlə açıq elan edən əməkdar artist Nərgiz Əliyarova müsabiqənin tarixindən bəhs edib.Proqramda yer alan əsərlər barədə məlumat verib. Müsabiqənin münsiflər heyətinin sədri, Xalq artisti Firəngiz Əlizadə müsabiqədəki əsərləri böyük sevgi ilə ərsəyə gətirdiyini bildirib. Diasporla İş üzrə Dövlət Komitəsinin sədri Fuad Muradov komitə adından təşkilatçılara təşəkkürünü bildirib. Prezidentin tapşırığı ilə xaricdə yaşayan soydaşlarımıza dəstək göstərildiyini xüsusi vurğulayıb. Mədəniyyət sahəsində təbliğ olunan istiqamətlərdən, onların həyata keçirilməsində bir neçə qurumun əməyinin vacibliyindən danışıb.. Türkiyənin Azərbaycandakı səfirinin müavini Barış Sayqın çıxışında tarixi zəfərimizin ardından baş tutan bu gözəl tədbirdə iştirak etməkdən məmnunluq duyduğunu qeyd edib. Tədbirdə Paris, İsrail, Kolumbiya, Türkiyə, Qazaxıstan, Britaniya, eləcə də azərbaycanlı laureat və diplomantlara mükafatlar təqdim olunub. Azərbaycan Dövlət Simli Kvarteti, Azərbaycan Dövlət Fortepiano Triosu, “cadeNZa” ansamblı, Nərgiz Əliyarova (piano), Gülnaz İsmayılova (vokal) və digər musiqiçilərin ifasında Üzeyir Hacıbəylinin və müsabiqə qaliblərinin əsərləri səslənib.   ..
24.09.2021 15:28
“Mədəniyyət/Culture” jurnalının yeni sayı işıq üzü görüb “Mədəniyyət/Culture” jurnalının  növbəti sayı yenə də həmişəki kimi maraqlı məzmunu və  baxımlı siması ilə oxucuların görüşünə gəlib. Jurnalın nəfis şəkildə süslənmiş üz qabığı və forzası  xalqımızın ölkənin Birinci xanımına olan olan sevgi  və sayğısını, Mehriban xanımın  həyat yolunu,”MEHRİBANlı dünyamızı”  ehtiva edən fotoşəkillərlə ifadə edir. Oxucular mündəricat üzrə jurnalı vərəqlədikcə 44 günlük Vətən müharibəsində şəhidlik zirvəsini fəth edən mədəniyyət xadimləri haqqında “Mədəniyyətdən əbədiyyətə”, o müharibədən qalib döyüşçü kimi evə dönmüş mədəniyyət xadimləri haqqında isə “Səhnədən hərb meydanına” layihələrində məlumatlana biləcəklər. “Gözəlliklər şairinin sevinən ruhu” sərlövhəli məqalə və fotokollaj 39 illik tarixi olan Vaqif Poeziya Günlərinin 29 ildən sonra yeni həyat qazanmasını əks etdirir. “Nizami – 880” rubrikası “Nizami Gəncəvi poeziyasının Şərq qaynaqları”, «Редкие сюжеты «Хамсе» Низами» və “Elmdir cövhəri kəhkəşanların” məqalələrindən ibarətdir. “Türkün Yunus Əmrəsi” məqaləsi 2021-ci ilin Türkiyədə “Yunus Əmrə İli” elan edilməsinə “Mədəniyyət/Culture” jurnalının layiqli töhfəsidir. “Ədəbiyyat” bölümünün “Söz sultanının sarsılmayan səltənəti” adlı daha bir məqaləsi Cənubi Azərbaycanda yaşayıb-yaratmış sevimli şairimiz Məhəmmədhüseyn Şəhriyarın oğlu Hadi Behcətlə şairin Təbrizdəki ev-muzeyinə “səyahət” və varislə müsahibəni təqdim edir.  Bu bölümü görkəmli dilçi-alim Əbdüləzəl Dəmirçizadə haqqında qələmə alınmış “Dəmirçizadə dühası” və ədəbiyyatımızın sütunlarından biri Abdulla Şaiqdən bəhs edən “Milli ruh və mənəviyyatımıza işıq salan Şaiq” məqalələri tamamlayır. “Musiqi” bölümü “Barrel Jazz Nights – 2021” silsilə konsertlərinin ritmlərinin sözlə ifadəsidir. “3 Vaqif və Villis Konover” essesi caz mövzusunun orijinal davamıdır. “Teatr” bölümündə bu dəfə də Jan-Lui Barronun “Teatr haqqında düşüncələr” kitabının dilimizə tərcüməsinin davamı ilə tanış ola biləcəksiniz. “Kino” bölümü 44 günlük Vətən müharibəsinin sənədli kino ifadəsi olan 44 dəqiqəlik “BİZ” filminə həsr edilib. “Portret” bölümü musiqiçilərimizə həsr olunaraq “Zəriflik və səmimiyyət harmoniyası – xalq artisti Zəhra Quliyeva” məqaləsindən və “Musiqişünaslığa xidmətlə zinətlənən ömür” başlıqlı İmruz Əfəndiyeva ilə müsahibədən ibarətdir. Hər dəfə olduğu kimi bu dəfə də  jurnalı ədəbiyyat və incəsənətin müxtəlif sahələrini təhlil edən  elmi məqalələr yekunlaşdırır. ..
24.09.2021 14:01
Heykəltəraşlıq abidələrinin, xatirə-memorial və memarlıq komplekslərinin ucaldılması və demontajı ilə bağlı Mədəniyyət Nazirliyinin məlumatıHeykəllər, büst və barelyeflər qədim zamanlardan günümüzə kimi həyatımızda mövcud olan mühüm sənət nümunələridir. Dünya şəhərsalma və memarlığında tarix boyu bu sənət nümunələrinin rolu böyük əhəmiyyət kəsb edib. Əksər hallarda açıq havada, böyük şəhərlərin meydanlarında, bağlarda, bəzən isə ictimai binaların daxilində mühüm tarixi hadisələrin, siyasi xadimlərin, sərkərdələrin, mütəfəkkirlərin, yazıçıların, xalqın rəğbətini və hörmətini qazanmış şəxsiyyətlərin şərəfinə möhtəşəm monumental heykəltəraşlıq abidələri ucaldılır. Ucaldılan hər bir monumental əsər vətəndaşlarımızla yanaşı, həm də ölkəmizə səfər edən xarici qonaqlar və turistlərdə də ölkəmiz haqqında fikir formalaşdırır. Bu səbəbdən ölkə ərazisində hər bir abidənin bədii, elmi əhəmiyyəti, onun konsepsiyası, insanlarda yaratdığı təəssürat və s. cəhətləri nəzərə alınaraq ucaldılmalıdır. Lakin son zamanlar ölkə ərazisində ictimai və tarixi məkanlarda aidiyyəti qurumlarla razılaşdırılmadan müxtəlif abidə, heykəl, büst və barelyeflərin quraşdırılması hallarına təsadüf edilir. Estetik görünüşü və bədii konsepsiyası əksər hallarda yerləşdiyi ərazinin memarlıq görkəminə uyğun gəlməyən həmin abidələr ictimaiyyət tərəfindən birmənalı qarşılanmır. Abidələrin ümumi görünüşünün qorunub saxlanılması məqsədləri üçün 2009-cu ildən etibarən Azərbaycan Respublikası Prezidentinin Sərəncamına əsasən Mədəniyyət Nazirliyi  tərəfindən yaradılmış heykəltəraşlıq abidələrinin, xatirə-memorial və memarlıq komplekslərinin ucaldılması və demontajı üzrə aidiyyəti dövlət orqanlarının nümayəndələrindən ibarət ekspert Komissiyası fəaliyyət göstərir. Bununla əlaqədar bildiririk ki, ictimai yerlərdə monumental abidələrin (heykəl, büst, barelyeflərin) ucaldılması və demontajı ilə bağlı layihələr bu sahədə peşəkar mütəxəssislər tərəfindən bədii və elmi cəhətdən qiymətləndirildikdən sonra  Komissiyanın  müvafiq rəyinə uyğun olaraq həyata keçirilməlidir. ..