Lənkəran teatrının nümayəndə heyəti İranda keçirilən Fəcr Beynəlxalq Teatr Festivalında təmsil olunub
Yanvarın 6-dan İran İslam Respublikasında 37-ci Fəcr Beynəlxalq Teatr Festivalı işinə başlayıb. Həmin nüfuzlu sənət yarışması çərçivəsində İranın Ərdəbil şəhərində dünyanın ayrı-ayrı teatrlarının tamaşalarına baxış keçirilib.
Lənkəran Dövlət Dram Teatrının dörd nəfərlik nümayəndə heyəti qonaq qismində festivalda təmsil olunub. Teatrının direktoru Tofiq Heydərov Beynəlxalq Fəcr Teatr Festivalının İranın mədəni həyatında mühüm əhəmiyyət kəsb etdiyini bildirib. Onun sözlərinə görə, onlar Ərdəbildə olduqları dörd gün müddətində bir sıra sənət kollektivlərinin, o cümlədən Azərbaycan Dövlət Gənc Tamaşaçılar Teatrının tamaşalarını izləmək imkanını qazanıblar: ”Səfərimiz zamanı işgüzar görüşlərə də qatıldıq. Belə ki, ayr-ayrı teatr truppalarının məşqlərinə baxaraq onların iş prosesləri ilə yaxından tanış olduq, teatr truppalarının rəhbərləri, rejissor və aktyorlarla görüşüb yaradıcılıq söhbətləri və fikir mübadilələri apardıq”.
T.Heydərovun bildirib ki, Ərdəbildə olduqları müddətdə rəhbərlik etdiyi kollektivlə bağlı bir sıra yaradıcılıq layihələrinin planlaşdırılması məsələlərində iştirak edib. Belə ki, Ərdəbil Vilayət Mədəniyyət Baş İdarəsi ilə Lənkəran Dövlət Dram Teatrı arasında gələcək əməkdaşlığa dair razılaşma da bu qəbildəndir.
Tədbirin bağlanış mərasimində Lənkəran teatrının direktoru T.Heydərov çıxış edərək festivalın gedişindən məmnun qaldıqlarını bildirmiş, qonaqpərvərliyə görə tədbirin təşkilat komitəsinə təşəkkür etmişdir.