Qara Qarayev adına Mərkəzi İncəsənət Məktəbi ölkəmizdə fəaliyyət göstərən ən aktiv və qabaqcıl məktəblərdən biridir
Qara Qarayev adına Mərkəzi İncəsənət Məktəbi ölkəmizdə fəaliyyət göstərən ən aktiv və qabaqcıl məktəblərdən biridir. Bu məktəbdə hər il mütəmadi olaraq istedadlı şagirdlər yetişir. Ənənəvi olaraq hər il istedadlı şagirdlərimiz Azərbaycan ifaçılıq məktəbini ölkəmizdən kənarda layiqli şəkildə təmsil edərək, Q.Qarayev adına Mərkəzi İncəsənət Məktəbinin adını daim uca tutmuşlar.
Yeni tədris ilinin başlanması ilə əlaqədar olaraq Azərbaycan Respublikası Mədəniyyət və Turizm Nazirliyinin Əmrinə əsasən 2017/2018-ci il tədris ilinin birinci günü-2017-ci il 15 sentyabr tarixində məktəb və mərkəzlərdə “Bilik günü”nün yüksək səviyyədə qeyd olunmasını, ilk dərsin Azərbaycan xalqının ümummilli lideri, Ulu öndər Heydər Əliyevin həyat və fəaliyyətinə həsr olunması nəzərdə tutulmuşdur.
Başa vurduğumuz tədris ilində əldə etdiyimiz yüksək nailiyyətlərimizi xatırlatmaq istərdik və bu uğurlarımız bizə yeni tədris ilində nöbvəti qalibiyyətlər qazanmaq stimulunu verir.Belə ki, Cavid Yusifzadə (fortepiano) , Səbinə Rzazadə (fortepiano), Jalə Quliyeva (fortepiano) , Nərgiz Əliyeva (fortepiano) , Münəvvər Alıyeva (fortepiano) , Murad Əlizadə (skripka), Nuray Seyid (skripka) , Zərrin Əliyeva (skripka), Ümid Mustafayev (skripka) , Lalə İbrahimova (vokal) , Fizzə Əlizadə (kamança), Nəzrin Cəfərzadə (kamança) , Orxan Əliyev (kamança) , Zakir Allahverdili (qoboy) , Leyla Haşımova (qanun) , Kənan Namazov (tar) kimi məktəbimizin bir çox istedadlı şagirdləri Respublika və Beynəlxalq müsabiqələrdə yüksək yerlərə layiq görülərək diplomlarla təltif olunmuşlar. 2016-cı ilin iyun ayında Kaunasda VI Beynəlxalq “Gradus ad Parnassum”adlı müsabiqədə Cavid Yusifzadə I yerə layiq görülərək, bir daha özünü mükəmməl, virtuoz ifaçı kimi təsdiq etməyə müvəffəq olmuşdur. Bundan başqa o, Cenevrə şəhərində Ədilə Əliyeva adına Pianoçuların XI Beynəlxalq Müsabiqəsində mükəmməl çıxışına görə laureat və “Gənc istedad”adına layiq görülərək Alfred Korto adına Paris Konservatoriyasında təhsil almaq hüququ qazanmışdır. Digər istedadlı şagirdimiz Səbinə Rzazadə isə Kanadada Brandon Universitetinin musiqi şöbəsinə daxil olmuşdur.
Azərbaycan Respublikası Mədəniyyət və Turizm Nazirliyinin təşkilatçılığı ilə 2017-ci ilin aprel ayında keçirdiyi Uşaq xor kollektivlərinin IX respublika müsabiqəsində Q.Qarayev adına Mərkəzi İncəsənət Məktəbinin xor kollektivi Qran-Pri mükafatına layiq görüldü. Daha bir qürurumuz “Alov” rəqs kollektivi Moskvada keçirilən Avropa Rəqs Çempionatında birinci yeri qazandılar.
Həmçinin bu musiqi ocağının istedadlı şagirdləri Zərrin Əliyeva (skripka), Lalə İbrahimova (vokal), Yasin Həsənov(vokal), Cavid Yusifzadə (fortepiano) Prezident təqaüdünə layiq görülmüşlər. Qeyd etdiyimiz bu uğurlu nəticələrimizin sübutu kimi məktəbimizin bu ilki məzunlarının (Mirhüseynxan Talışınski /saksafon/ , Murad Əlizadə /skripka/ , Mədina Bağırova /fortepiano/ , Nəzrin Cəfərzadə /kamança/ , Səma Həsənəliyeva /fortepiano/ ) Bakı Musiqi Akademiyasına və Azərbaycan Dövlət Milli Konservatoriyasına yüksək ballarla daxil olmalarını göstərə bilərik.
Qara Qarayev adına Mərkəzi İncəsənət Məktəbinin 80 illik yubileyi ilə əlaqədar olaraq qarşıda bir çox silsilə konsertlər və tədbirlər nəzərdə tutulur. Dekabr ayının 15-20 tarixində bu yubileylə bağlı Azərbaycan Respublikası Mədəniyyət və Turizm Nazirliyinin dəstəyi ilə bütün alətlər üzrə Beynəlxalq müsabiqəsi və Qara Qarayevin 100 illiyinə həsr olunmuş II Beynəlxalq müsabiqəsinin keçirilməsi planlaşdırılır. Bir çox görkəmli bəstəkarlarımız və musiqiçilərimizin yubiley tədbirləri qeyd ediləcək. Eləcə də respublikamızda fəaliyyət göstərən mötəbər konsert salonlarında konsertlər keçiriləcək. Məktəbimizin istedadlı şagirdləri bir çox Respublika müsabiqələrində , o cümlədən, Habil Əliyev adına II Respublika müsabiqəsində iştirak edəcəklər. Daima yüksək nailiyyətlər əldə etmiş “Alov” rəqs kollektivimiz isə respublikamızda keçiriləcək rəqs müsabiqəsinə qatılacaq.