Rusiya Federasiyasının Tula şəhərində MDB ölkələrinin gənclərinin Mədəniyyət Forumu keçirilmişdir
Müstəqil Dövlətlər Birliyində mədəniyyət ili çərçivəsində 13-16 may 2018-ci il tarixində Rusiya Federasiyasının Tula şəhərində “Gələcəyə istiqamətlənmiş birlik: mədəniyyət, ənənələr, müasirlik” mövzusunda MDB ölkələrinin gənclərinin Mədəniyyət Forumu keçirilmişdir.
Forumda Rusiya Federasiyasından, Azərbaycan, Belarus, Qazaxıstan, Qırğızıstan, Türkmənistan, Tacikistan, Özbəkistan və Ermənistan Respublikasından əlli nəfərdən çox nümayəndə iştirak etmişdir. Forum çərçivəsində sessiya iclaslarında MDB-də mədəniyyət ili: tendensiya və perespektivlər, mədəniyyət sahəsində könüllülük, gələcəyin şəhərləri, musiqi, teatr, rəqəmsal mədəniyyət və digər məsələlərlə bağlı müzakirələr aparılmış, habelə rəsmi görüş və bədii proqramlar təşkil olunmuşdur. Forumun mərkəzi mövzusu gənc istedadların inkişafında dövlət dəstəyinin əhəmiyyəti, onların humanitar sahədə əməkdaşlıqlarının təşviq edilməsi, gənclərin milli və ümumbəşəri mədəni dəyərlər vasitəsilə qarşılıqlı hörmət ruhunda tərbiyəsi və s. olmuşdur. Ölkələrin nümayəndə heyətlərinin tərkibinə qatılmış gənc istedadlar Tula vilayətinin Venev rayonundakı Beynəlxalq Mədəniyyət Mərkəzinin açılışında iştirak edərək öz milli musiqi, rəqs, vokal sənətindən nümunələr göstərmişlər
Forum çərçivəsindəki tədbirlərdə ölkəmizi Mədəniyyət Nazirliyinin Elm, təhsil və gənclərlə iş şöbəsinin məsləhətçisi Vüqar Baxışov, Azərbaycan Dövlət Rus Dram Teatrının rejissoru Tural Mustafayev, Azərbaycan Dövlət Akademik Filarmoniyasının Dövlət Rəqs Ansamblının konsertmeysteri, Əməkdar artist Vüqar Camalzadə, Azərbaycan Dövlət Rəsm Qalereyasının şöbə müdiri Əminə Manafova, Azərbaycan Milli Konservatoriyasının tələbələri, Prezident təqaüdçüləri Nicat Məsimov (balaban) və Nihat Orucov (milli vokal), habelə Azərbaycan Respublikasının Rusiya Federasiyasındakı səfirliyinin əməkdaşı Vüqar İmaməliyev təmsil etmişdir.