Azərbaycanın Xorvatiyadakı səfirliyi, “İçərişəhər” Dövlət Tarix-Memarlıq Qoruğu İdarəsi və Xorvatiya Mədəniyyət Nazirliyinin birgə təşkilatçılığı ilə Xorvatiyanın paytaxtı Zaqreb şəhərində Bakı Marionet Teatrı “Leyli və Məcnun” tamaşası ilə çıxış edib.
Tədbiri Azərbaycanın Xorvatiyadakı səfiri Fəxrəddin Qurbanov açaraq Bakı Marionet Teatrının kollektivini Fransanın Şarlevil-Mezyer şəhərində Beynəlxalq Marionet Teatrı Festivalında bir neçə gün öncə baş tutmuş uğurlu çıxışları ilə əlaqədar təbrik edib.
Səfir Azərbaycan ilə Xorvatiya arasında əlaqələrin yüksək səviyyədə olduğunu, Azərbaycan Prezidenti İlham Əliyevin Xorvatiyaya 2018-ci ildə rəsmi səfəri çərçivəsində iki ölkə arasında imzalanmış 2018-ci, 2019-cu və 2020-ci illər üzrə mədəni əməkdaşlığa dair Proqramı xatırladaraq, proqramın icrası ilə bağlı hər iki ölkədə silsilə mədəni tədbirlərin keçirildiyini tamaşaçıların diqqətinə çatdırıb.
Tədbir Zaqreb Kukla Teatrının böyük zalında baş tutub. Teatrın səhnəsində Azərbaycan aktyorlarının idarəsi ilə marionet kuklaları Qədim Şərq folkloruna məxsus incə və faciəli məhəbbət əfsanəsi olan “Leyli və Məcnun” operasının qəhrəmanlarını təkraredilməz şəkildə canlandırıblar.
Bakı Marionet Teatrının truppası tərəfindən Məhəmməd Füzulinin eyniadlı poeması və Azərbaycan peşəkar musiqi sənətinin banisi Üzeyir Hacıbəylinin operası əsasında ərsəyə gətirilmiş tamaşa ifa olunub və Xorvatiyada akkreditə olunmuş diplomatik korpus, Xorvatiya mədəniyyət və yerli ictimaiyyəti tərəfindən xüsusi maraqla qarşılanıb.